كەز كەلگەن جان ءۇشىن ەڭ قىمبات جان – اتا-اناسى. اتا-اناسىنىڭ كوزى ءتىرى كەزىندە لايىقتى دارەجەدە قۇرمەت كورسەتىپ، جاقسىلىق جاساۋ ءار پەرزەنتتىڭ پارىزى دەسەك تە بولادى. ال جاقسى تاربيەنى بەسىكتەن كوترىپ وسكەن بالا اتا-اناسىنا قۇرمەت كورسەتپەۋى استە مۇمكىن ەمەس. قازىرگى جاھاندانۋ كەزەڭىندە ءومىر ءسۇرىپ، اقپارتتىق اعىندا جۇرگەن بالا ءۇشىن بۇل قانشالىقتى وزەكتى، قازىرگى جاستارىمىز اتا-اناسىن قانشالىقتى سىيلاي بىلەدى دەگەن دەگەن ماقساتپەن ءال-فارابي اتىنداعى قازاق ۇلتتىق ۋنيۆەرسيتەتى فيلولوگيا فاكۋلتەتتە ماڭىزدى كەزدەسۋ ءوتتى. فاكۋلتەتتىڭ ءى كۋرس ماگيسترانتتارى سىمبات اسانوۆا پەن ايگەرىم دالداباي ۇيىمداستىرۋىمەن وتكەن كەزدەسۋگە  اقىن، اۋدارماشى، جازۋشىلار وداعىنىڭ مۇشەسى سايات قامشىگەر قاتىستى.  «جەتىم كورسەڭ جەبەي ءجۇر» تاقىرىبى اياسىندا وتكەن بۇل اشىق تاربيە ساعاتىندا اقىن قازاق فيلولوگياسىنىڭ 1 كۋرس ستۋدەنتتەرىن ءوزى قازاق تىلىنە اۋدارعان باشقۇرت جازۋشىسى ايگيز بايمۇحامەتوۆتىڭ «تاستاماشى، انا» كىتابىمەن تانىستىردى.

• اۆتور ءوزى اتا-اناسىنان جاستاي ايىرىلىپ جەتىمدەر ۇيىندە وسەدى، سول جەردەگى باسىنان وتكەن ايانىشتى تاعدىرىن اڭگىمەلەيدى. مەن اۆتورمەن تانىسىپ، سىيلاعان كىتابىن وقىپ، بىردەن قازاق ءتىلدى وقىرمانعا جەتكىزۋ كەرەك دەپ ويلادىم. جانە بۇل ويىم ءوز جەمىسىن بەردى. جەتىم بالانىڭ باسىنان وتكەن ايانىشتى تاعدىردى وقىعان ءار كورەرمەن اتا-اناسىنىڭ ءقادىرىن ءبىلدى. جۇرەگىندە مەيىرىمدىلىك سەزىمى وياندى. ال بۇل قازىرگى قاتىگەز قوعام ءۇشىن جەتىسپەيتىن سەزىمنىڭ بىرىنە اينالىپ بارادى. ياعني كىتاپ ارقىلى تاربيەلەنىپ جاتقان وقىرمانىمنىڭ كۇننەن كۇنگە ارتىپ جاتقانىنا قۋانىشتىمىن.  ءشازىر كىتاپتىڭ 8-باسىلىمى شاعىپ جاتىر، - دەگەن  سايات قامشىگەر شىعارمانىڭ جازىلۋ تاريحىنان، كوركەمدىك ەرەكشەلىگى مەن كەيىپكەرلەردىڭ قازىرگى ءومىرى جايىندا سىر شەرتىپ بەردى. “ەرتەگىسىز وتكەن بالالىق”، “كوشە بالالارى” اتتى جالعاسى شىققانىنا حاباردار ەتتى.

 ءبىلىم الۋشىلار قازىرگى تاڭدا ەلىمىزدەگى جەتىمدەر سانى مەن بالالار ءۇيىنىڭ جىل سايىن ازايىپ كەلە جاتقانى تۋرالى سلايد جاساپ، اقپاراتتارمەن ءبولىستى.   

كەزدەسۋگە مودەراتور بولعان «سەنىمەن بولاشاق» رقب وكىلى، جۋرناليست مەرۋەرت ماۋلەت قىزى  اتا-انانى سىيلاۋ تۋرالى ايتىپ، وزدەرى دە  بولاشاق اتا-انا رەتىندە ءار بالانىڭ تالىم-تاربيەسىنە كوڭىل ءبولۋ تۋرالى ويىمەن ءبولىستى.

• بۇگىندە وتباسىنداعى قۇندىلىقتار زامان اعىمىنا ساي وزگەرىپ جاتىر. «قاتىگەز بالا» قايدان شىعادى دەپ ساۋال تاستايمىز دا، ارعى جاعىنداعى سالدارىنا نازار سالمايمىز. «بالا تاربيەسى - بەسىكتەن» دەپ ءبىر-اق اۋىز سوزبەن تۇيىندەگەن مۇنى اتا+بابامىز. ياعني، اتا-انا سانالى بولسا بالا دا سانالى، ساليقالى بولىپ وسەدى. مەنىڭشە، وسىنداي باسقوسۋلاردى ءجيى وتكىزىپ، سايات قامشىگەر سياقتى وي سالارلىق دۇنيە جازىپ جۇرگەن ادەبيەتشىلەر قاۋىمى ارقىلى جاس ۇرپاق تاربيەسىنە ۇلەس قوسقان ابزال، - دەدى مودەراتور.

ءىس-شارا سوڭىندا جاستار بەلسەندىلىك تانىتىپ، تاقىرىپتا ساي پىكىرلەرىن ايتىپ، سۇراقتارىن قويدى. انا تۋرالى ولەڭدەرىن وقىپ، زامانداستارىنا وي سالدى.

قۇرالاي مۇحامادي،
ءال-فارابي اتىنداعى قازاق ۇلتتىق ۋنيۆەرسيتەتىنىڭ
قاۋىمداستىرىلعان پروفەسسورى، فيلولوگيا عىلىمدارىنىڭ كانديداتى،
ف.ع.ك.، قاۋىمداستىرىلعان پروفەسسور