– شىنى كەرەك، ءوزىڭىز تۋرالى جاعىمسىز اقپاراتتار كوپ تارايدى. ءبىراق ەشبىرىنە قارسى ءۋاج ايتپايسىز. بۇنى قالاي تۇسىنۋگە بولادى؟ ۇنسىزدىك كەلىسكەننىڭ بەلگىسى مە، الدە اقىماقپەن اقىماق بولۋدان قورقاسىز با؟
– بىرىنشىدەن، اقىماقپەن اقىماق بولعىم كەلمەيدى، ەكىنشىدەن، مەن ەشقاشان ەشكىمنىڭ الدىندا اقتالمايمىن. مەنىڭ اتىمنان كىم نە ايتسا دا ول وزدەرىنىڭ ەرىكتەرى. مەن بىرەۋ جامان ايتتى دەپ جامان نەمەسە جاقسى ايتتى دەپ جاقسى بولىپ قالمايمىن. مەن قانداي بارمىن، سونداي بولىپ قالا بەرەمىن، ەشكىمنىڭ الدىندا ەسەپ بەرمەيمىن. تەك اللانىڭ الدىندا ەسەپ بەرەمىن، نەگىزى اللانىڭ الدىندا ءبارىمىز ەسەپ بەرەمىز. مەنىڭ قانداي ادام ەكەنىمدى جانىمدا جۇرگەندەر جاقسى بىلەدى. قانداي دوس ەكەنىمدى دوستارىم بىلەدى. قانداي باۋىر ەكەنىمدى باۋىرلارىم بىلەدى.
قانداي اكە ەكەنىمدى ۇلدارىم بىلەدى. ال دۇشپاندارىم نە بىلەدى، نە ايتادى دە ويلايسىز؟ بىرەۋدى جامان دەگەننىڭ ءوزى جامان، بىرەۋدى جاقسى دەگەننىڭ ءوزى جاقسى. ال جاعىمسىز پىكىرلەرگە ءقازىر كوڭىل بولمەيمىن. وسىدان بىرنەشە جىل بۇرىن مەن تۋرالى جامان ءسوز ايتىلسا، جۇرەگىم اۋىرىپ، قينالاتىنمىن. ءقازىر شىنىمدى ايتسام، ەتىمنىڭ ۇيرەنگەنى سونشا، بىلق ەتپەيتىن دە بولدىم. نە جازىلاتىندارىن، ارينە، بىلەمىن، ءبىراق كوڭىلگە المايمىن. بىرەۋلەر ايتسا سەنبەس ەدىم، قالاي ءوزى تۋرالى ايتسا ءمان بەرمەيدى دەپ. شىن مانىندە ادام پىسەدى ەكەن. مەن ءقازىر ءپىسىپپىن، سوسىن ءمان بەرمەيمىن.
– وسى ورايدا ءسىز تۋرالى جالعان اقپارات تاراتىپ وتىرعان جۋرناليستەرگە وكپەڭىز بار شىعار؟
– مەن ولاردى جۋرناليست دەپ سانامايمىن. سوندىقتان ولارعا رەنجىمەيمىن، ول جۋرناليستيكا ەمەس. ول – سارى باسىلىم. ولار مەن تۋرالى وسەك جازىپ نان تاۋىپ جەپ وتىرسا، بالا-شاعالارىن باعىپ وتىرسا باقىتتى بولسىن! باسقا نە دەيمىن؟! باسقا ەشتەڭە قولدارىنان كەلمەسە، ساراپتاما جازا الماسا، پايدالى دۇنيە جاساي الماسا، نە ىستەيسىڭ؟ ال، جالا جاۋىپ، وسەك ويلاپ تاۋىپ تاراتقىشتاردى ەندى زاڭمەن قۋدالايمىن. ويتكەنى ارنارسەنىڭ شەگى بولادى. كىم بولسا، ول بولسىن ىزدەپ تابامىن، قاجەت بولسا، ارىز دا جازامىن.
