ءماجىلىس دەپۋتاتى اسحات ايماعامبەتوۆ قايىرىمدىلىق قورلارىنىڭ جۇمىسىن قاتاڭ باقىلاۋعا الۋ تۋرالى ماسەلەنى بۇرىننان قاۋزاپ كەلە جاتقانىن جەتكىزدى، دەپ حابارلايدى Dalanews.kz.
“مەملەكەتتىك قاراجاتتار بويىنشا ءتيىستى قورلار بار. ءتىپتى سامۇرىق-قازىنانىڭ قايىرىمدىلىق باعىتىندا جۇمىس ىستەيتىن ارنايى قورى بار. مەنىڭ ويىمشا، ءبىرىنشى كەزەكتە كۆازيمەملەكەتتىك ۇيىمداردىڭ قايىرىمدىلىققا جۇمسايتىن قاراجاتىن قاتاڭ باقىلاۋعا العان ءجون. كۆازيمەملەكەتتىك ۇيىمدار قايىرىمدىلىقپەن اينالىسامىن دەسە — جاقسى، ءبىراق ءبىرىنشى كەزەكتە اشىقتىق قامتاماسىز ەتىلۋى قاجەت”، - دەپ جاۋاپ بەردى ول جۋرناليستەردىڭ قويعان سۇراعىنا.
ايماعامبەتوۆ ەلدە بەلەڭ العان ءتۇرلى قورعا بايلانىستى بيۋدجەت كودەكسىنە وزگەرىس ەنگىزۋ تۋرالى ۇسىنىس جولداعانىن دا اتاپ ءوتتى.
“حالىقتان جينالاتىن قاراجاتقا قاتىستى ناقتى ەرەجەلەر قاجەت. قازاقستاندىقتار ءاردايىم كومەك كورسەتۋگە دايىن، ءبىراق مۇنى تەك ءبىر قورعا شەكتەي المايمىز. قورلاردى جابۋ نەمەسە تىيىم سالۋ ارقىلى ماسەلەنى شەشە المايمىز. سول سەبەپتى جۇيەلى رەتتەۋ قاجەت. بۇل ماسەلەنى عىلىمي تۇرعىدا قاراستىرىپ، دۇرىس شەشىم قابىلداۋىمىز كەرەك”، – دەپ ءتۇسىندىردى ايماعامبەتوۆ.
دەپۋتاتتىڭ پىكىرىنشە، قايىرىمدىلىق سالاسىندا قوعام تاراپىنان قاداعالاۋ جانە اشىقتىقتى قامتاماسىز ەتەتىن ەرەجەلەر بولۋى شارت.
“مەن سەنىمدى قورلارعا عانا كومەكتەسەمىن. سەبەبى ولاردىڭ سايتتارىنا كىرىپ، ەسەپتەرىن قارايمىن. ءار تيىننىڭ قايدا جۇمسالعانى كورىنىپ تۇر. سوندىقتان سەنىم بار. ال كەيبىر قورلارعا سەنبەيتىندىكتەن، ولارعا كومەك قولىن سوزبايمىن. مىسالى، ارۋجان سايننىڭ قورىن بىلەمىن، ال “Biz birgemiz” قورى تۋرالى ەشقانداي اقپارات بولعان جوق”، – دەدى ول.
اسحات ايماعامبەتوۆ قايىرىمدىلىق قورلارىنىڭ جۇمىسىن رەتتەۋدى جەتىلدىرۋ ماسەلەسىن قوعاممەن بىرگە تالقىلاپ، مۇقيات شەشۋگە شاقىردى.
ايتا كەتەيىك، بۇعان دەيىن ءماجىلىس دەپۋتاتى، AMANAT پارتياسى فراكسياسىنىڭ جەتەكشىسى ەلنۇر بەيسەنبايەۆ Biz Birgemiz Qazaqstan قايىرىمدىلىق قورىنىڭ باسشىسى پەريزات قايراتتىڭ ۇستالۋىنا قاتىستى پىكىر بىلدىرگەن ەدى.
“تەرگەۋدىڭ اياقتالعانىن كۇتۋىمىز قاجەت. مۇنداي ىستەردە اسىعىس شەشىم شىعارۋعا بولمايدى. ءاربىر قايىرىمدىلىق قورىنىڭ باسشىسى حالىقتان تۇسكەن ءار تەڭگە ءۇشىن جاۋاپتى”، – دەدى دەپۋتات.
دەپۋتات “Biz Birgemiz” قورى مەن AMANAT پارتياسىنىڭ بايلانىسى بار دەگەن اقپاراتتى جوققا شىعاردى. ايتۋىنشا، ەسىمى اتالعان ازاماتتار قوردا ءۇش جىل بۇرىن جاس ۆولونتەر رەتىندە قىزمەت اتقارعان.
“پاندەميا كەزىندە ءبىز 600 مىڭ ازاماتقا كومەك كورسەتتىك. ول كەزدە قوردا جاس ۆولونتەرلەر، بەلسەندى جاستار جۇمىس ىستەدى. بۇگىندە ولاردىڭ كەيبىرى بەلگىلى ءبىر جەتىستىكتەرگە جەتىپ، لاۋازىمدارعا يە بولدى، ال كەيبىرى پارتياعا مۇشە بولىپ كىردى. ءبىراق قوردىڭ پارتياعا رەسمي بايلانىسى جوق”، – دەدى بەيسەنبايەۆ.
سونىمەن قاتار دەپۋتات قايىرىمدىلىق قورلارىنا توسقاۋىل قويۋدىڭ قاجەتى جوق ەكەنىن دە اتاپ ءوتتى.
“مۇنداي قورلاردىڭ جۇمىسى اشىق ءارى ءادىل بولۋى ءتيىس. وكىنىشكە قاراي، حالىق سەنىمىن تەرىس پايدالاناتىندار كەزدەسەدى. بۇل تەك ءبىر قورعا قاتىستى ەمەس، جالپى قوعامداعى ماسەلە. سوندىقتان بارلىعىن تەكسەرىپ، رەتكە كەلتىرۋ قاجەت”، – دەدى ول.
