«استرازەنەكا» بيوفارماسيەۆتيكالىق كومپانياسى جانە «قازاقستاندىق جۇرەك جەتكىلىكسىزدىگى ماماندارىنىڭ قوعامى» رەسپۋبليكالىق قوعامدىق بىرلەستىگى جۇرەك جەتكىلىكسىزدىگى بويىنشا دياگنوستيكا جاساۋ جانە ەمدەۋ سالاسىنداعى ۇزاق مەرزىمدى ىنتىماقتاستىق تۋرالى بىرلەسكەن مەموراندۋمعا قول قويدى. تاراپتار قازاقستاندا جۇرەك-قان تامىرلارى اۋرۋلارى بار پاسيەنتتەردىڭ ءومىر ءسۇرۋ ساپاسىن جاقسارتۋ ءۇشىن كۇش-جىگەردى بىرىكتىرۋگە نيەتتى.
مەموراندۋمعا قول قويۋعا قازاقستانداعى «استرازەنەكا» وكىلدىگىنىڭ ديرەكتورى ماريا شيپۋليەۆا مەن «قازاقستاندىق جۇرەك جەتكىلىكسىزدىگى ماماندارىنىڭ قوعامى» رقب پرەزيدەنتى سالتانات اندوسوۆا قاتىستى.
«استرازەنەكا» بيوفارماسيەۆتيكالىق كومپانياسى مەن «قازاقستاندىق جۇرەك جەتكىلىكسىزدىگى ماماندارىنىڭ قوعامى» رقب اراسىنداعى باستاما دياگنوستيكانى جاقسارتۋ سالاسىنداعى ىنتىماقتاستىقتى جانە اميلويدوز سياقتى جۇرەككە اسەرى بار سيرەك كەزدەسەتىن اۋرۋلاردى ەمدەۋگە يننوۆاسيالىق تاسىلدەردى ەنگىزۋدى كوزدەيدى.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتى بويىنشا، جۇرەك-قان تامىرلارى اۋرۋلارى الەمدە ءولىم-جىتىم بويىنشا قايعىلى باسىمدىقتى بۇرىننان ساقتاپ كەلەدى، ال قازاقستان دا بۇل رەتتە تىستا قالمايدى.
اسىرەسە سوزىلمالى جۇرەك جەتكىلىكسىزدىگىمەن اۋىراتىن ادامداردا جوعارى قاۋىپتىلىك ساقتالادى، ويتكەنى بۇل كەسەل كوبىنەسە ارتەريالىق گيپەرتەنزيانىڭ، جۇرەكتىڭ يشەميالىق اۋرۋىنىڭ، ريەۆماتيكالىق اقاۋلاردىڭ جانە ءارتۇرلى شىعۋ تەگى بار انەميانىڭ سالدارى بولىپ تابىلادى.
جۇرەك-قان تامىرلارى پاتولوگياسىنىڭ ەرتە دياگنوستيكاسى – سالاۋاتتى، ءارى ساپالى ۇزاق ءومىر سۇرۋگە جانە جۇرەك-قان تامىرلارى ءولىمىن ازايتۋعا جول اشادى. وسى تۇرعىدا ىنتىماقتاستىق تۋرالى مەموراندۋمنىڭ ماڭىزدى اسپەكتىسى ەلىمىزدىڭ ايماقتارىندا كارديولوگتاردى، تەراپيەۆتتەردى، جالپى پراكتيكا دارىگەرلەرىن، مەيىربيكە ءىسى ماماندارىن سوزىلمالى جۇرەك جەتكىلىكسىزدىگى (سجج) باعدارلاماسىنا، سونداي-اق بارلىق فەنوتيپتەرى بار سجج دياگنوستيكاسىنىڭ ەحوكارديوگرافيالىق ادىستەرىنە وقىتۋ بولىپ تابىلادى.
سالتانات اندوسوۆا، «قازاقستاندىق جۇرەك جەتكىلىكسىزدىگى ماماندارىنىڭ قوعامى» رقب پرەزيدەنتى: «ءبىز ۋاقتىلى دياگنوستيكانىڭ ماڭىزدىلىعى تۋرالى قايتا-قايتا ايتۋدى ءجون سانايمىز، سەبەبى ول دارىگەرلەرگە جۇرەك جەتكىلىكسىزدىگىنىڭ نەعۇرلىم جۇمساق جانە باسقارىلاتىن كەزەڭىن تانۋعا جول اشادى، بۇل ءوز كەزەگىندە ءولىم-جىتىمنىڭ ازايۋىنا ىقپال ەتۋگە مۇمكىندىك بەرەدى. بۇگىن ءبىز تەراپيا رەتىندە ءتورت كومپونەنتتى سحەمالاردى قولدانۋ تۋرالى اڭگىمەلەدىك، سونىمەن قاتار ەمدەۋدى دۇرىس جانە ۋاقتىلى تاعايىنداۋدىڭ ماڭىزدىلىعىن دا اتاپ وتتىك. ءبىزدىڭ ۇمتىلىستارىمىز ەلىمىزدىڭ كارديولوگيالىق قىزمەتىن جاقسارتۋعا باعىتتالعان، سونىڭ ىشىندە وڭىرلەردەگى جۇمىستى دا ايرىقشا اتاپ وتكەن ابزال. مەموراندۋمعا قول قويۋ – ورتاق ماقساتتارىمىزعا جەتۋدىڭ كەزەكتى قادامى».
ىنتىماقتاستىقتىڭ ماڭىزدى ماقساتتارىنىڭ ءبىرى رەتىندە وسى دياگنوزدار كەزدەسەتىن پاسيەنتتەردى باسقارۋعا حالىقارالىق تاسىلدەر مەن ستاندارتتاردى ەنگىزۋدى، سونىڭ ىشىندە، فارماكولوگيالىق قولداۋدى ايتۋعا نەگىز بار. بۇعان قوسا، مەموراندۋمنىڭ قابىلدانۋى ناقتى كلينيكالىق پراكتيكا جاعدايىندا ەلدەگى سوزىلمالى جۇرەك جەتكىلىكسىزدىگى بار پاسيەنتتەردى باسقارۋ قۇنىن وڭتايلاندىرۋمەن بايلانىستى كلينيكالىق-ەكونوميكالىق زەرتتەۋلەردى ۇيىمداستىرۋدا جاڭا بەلەستەردى باعىندىرۋعا مۇمكىندىك بەرەدى.
– ءبىزدىڭ «قازاقستاندىق جۇرەك جەتكىلىكسىزدىگى ماماندارىنىڭ قوعامى» رقب-مەن ىنتىماقتاستىعىمىز ەلىمىزدەگى سوزىلمالى جۇرەك جەتكىلىكسىزدىگىنىڭ دياگنوستيكاسى مەن ەمدەۋىن جاقسارتۋعا باعىتتالعان. ءبىز قازاقستاندا ءولىم-جىتىمدى ازايتۋ جانە پاسيەنتتەردىڭ ءومىر ءسۇرۋ ساپاسىن جاقسارتۋ ماقساتىندا وسى اۋىر كەسەلمەن نەعۇرلىم ءتيىمدى كۇرەسۋ ءۇشىن حالىقارالىق ستاندارتتار مەن يننوۆاسيالىق تاسىلدەردى ەنگىزۋگە تىرىسامىز، – دەدى قازاقستانداعى «استرازەنەكا» وكىلدىگىنىڭ ديرەكتورى ماريا شيپۋليەۆا.
ال ق ر دەنساۋلىق ساقتاۋ مينيسترلىگىنىڭ شتاتتان تىس باس كارديولوگى، «قازاقستاندىق جۇرەك جەتكىلىكسىزدىگى ماماندارىنىڭ قوعامى» رقب ۆيسە-پرەزيدەنتى ماحاببات بەكبوسىنوۆا بۇگىنگى قول قويۋ ءراسىمىن سوزىلمالى جۇرەك جەتكىلىكسىزدىگىن ەمدەۋگە ماماندانعان دارىگەرلەر ءۇشىن ايتۋلى وقيعا ەكەنىن العا تارتتى.
– مەموراندۋمعا قول قويۋ – بۇل ءبىزدىڭ قوعام مەن «استرازەنەكا» كومپانياسى ءۇشىن ماڭىزدى ءىس-شارا، ال ەڭ باستىسى، سوزىلمالى جۇرەك جەتكىلىكسىزدىگىن ەمدەۋ باعدارلاماسىندا جۇمىس ىستەيتىن دارىگەرلەر ءۇشىن اتاۋلى وقيعا. ءبىزدىڭ ىنتىماقتاستىعىمىز پاسيەنتتەرىمىزدىڭ مۇددەلەرىن باسشىلىققا الادى. بۇل ەرتە دياگنوستيكا مەن دۇرىس ەمدەۋدى بىلدىرەدى. ءبىزدىڭ ۇزاق مەرزىمدى جانە قىسقا مەرزىمدى جوبالارىمىزداعى بىرلەسكەن نەگىزگى مىندەتتەر تۋرالى ايتاتىن بولساق، وعان دارىگەرلەرگە قاجەتتى ءبىلىم بەرۋ مەن ساراپتامانى ۇسىنۋ كىرەدى. حالىقارالىق ستاندارتتار مەن كلينيكالىق حاتتامالارعا سايكەس، دياگنوستيكا مەن ەمدەۋ تۋرالى دۇرىس اقپاراتپەن قامتاماسىز ەتۋ بىزگە ءار پاسيەنتتى تەراپياعا بەيىمدىلىگى تۇرعىسىنان باقىلاۋعا وڭتايلى جول ۇسىنادى، – دەپ ماحاببات بەكبوسىنوۆا ويىن ورتاعا سالدى.
