استانالىق مەدبيكە مەديسينا سالاسىنداعى شىندىقتى ايتتى. ونىڭ بەينەۇندەۋى الەۋمەتتىك جەلىدە تارادى، – دەپ حابارلايدى Dalanews.kz.

ونىڭ ايتۋىنشا، 5-7 جىلدان بەرى مەدبيكە بولىپ جۇمىس ىستەپ كەلەدى. ەندى ول بۇل سالادان كەتكىسى كەلەتىنىن جەتكىزدى. استانا تۇرعىنىنىڭ سوزىنشە، مۇنىڭ سەبەبى كوپ.

"24 تاۋلىك اۋىسىمنان شىعىپ ەندى ۇيگە كەلگەنمىن، ۇيىقتايىن دەپ جاتىرمىن، مەنى وياتىپ الدى. جۇمىستان حابارلاسىپ جاتىر، ءبىر ناۋقاستىڭ قان قىسىمى كوتەرىلىپ كەتىپتى. "كەشە ءدارىسىن بەردىڭ بە؟" دەيدى. كىم كىنالى دەپ ويلايسىزدار؟ كەشە جۇمىس ىستەگەن مەدبيكە"، - دەدى ول.

مەديسينا قىزمەتكەرى ناۋقاستىڭ قان قىسىمى جوعارى ەكەنىن بىلەتىنىن، دارىلەرىن بەرگەنىن ايتادى.

"مۇنداي جاعدايدا ۇنەمى دارىگەر ەمەس، مەدبيكە كىنالى بولادى. ءبىر ادامدى كىنالى قىلىپ شىعارۋ كەرەك. ول - مەدبيكە. جالاقىمىز دا از، ورتاشا ەسەپپەن 200 مىڭ تەڭگە كولەمىندە، استانادا تۇرامىن، استانا بويىنشا ايتامىن"، - دەيدى ول.

سونىمەن قاتار، ول ءبىر مەدبيكە بىرنەشە ادامنىڭ جۇمىسىن ىستەيتىنىن دە جەتكىزدى.

"ءبىر جەرلەردە بەس ادامنىڭ جۇمىسىن ءۇش ادام ىستەپ وتىرادى"، - دەدى ۆيدەوداعى ايەل.