ەلىمىزگە اۋقىمدى ءىس-شاراعا قاتىسۋ ءۇشىن ەۋروپا، تاياۋ شىعىس، كاۆكاز، ورتالىق جانە وڭتۇستىك-شىعىس ازيانىڭ 25 ەلىنەن دەلەگاتتار، بيزنەس وكىلدەرى، مينيسترلىكتەر مەن حالىقارالىق ۇيىمداردىڭ باسشىلارى كەلدى. سونىمەن قاتار استاناعا ەەك، تۇركيا، وزبەكستان، تاجىكستان جانە قىرعىزستان كولىك مينيسترلەرى مەن ءازىربايجان، بولگاريا، گرۋزيا جانە لاتۆيا مينيسترلىكتەرى باسشىلارىنىڭ ورىنباسارلارى كەلدى. ءىس-شارالاردىڭ رەسمي اشىلۋ راسىمىنە قازاقستان رەسپۋبليكاسىنىڭ كولىك ءمينيسترى مارات قارابايەۆ قاتىستى.
«ۇيىمداستىرىلىپ وتىرعان كورمە مەن فورۋم جۇمىسى ەۋرازيا قۇرلىعىنىڭ كولىك-كوممۋنيكاسيالىق كەشەنىن دامىتۋ پەرسپەكتيۆالارىنا ارنالعان. اتالعان ءىس-شارالار وزەكتى ماسەلەلەردى تالقىلاۋ جانە ولاردى شەشۋدىڭ پراكتيكالىق جولدارىن ىزدەۋ، سونداي-اق مەملەكەتتىك قۇرىلىمدار مەن بيزنەس وكىلدەرىنىڭ ديالوگى ءۇشىن ەڭ ءتيىمدى الاڭ بولىپ سانالدى. سونداي-اق كولىك سالاسىن دامىتۋ سالاسىنداعى ماڭىزدى ماسەلەلەردى تالقىلاۋعا جانە قازىرگى ەكونوميكالىق جاعدايدا ودان ءارى ءتيىمدى دامۋ جولدارىن بەلگىلەۋگە مۇمكىندىك بەرەدى»، - دەدى قازاقستان رەسپۋبليكاسىنىڭ كولىك ءمينيسترى.
مارات قارابايەۆ قازاقستان ماتەريكتىڭ ماڭىزدى كولىك جەلىلەرىنىڭ تورابىندا ورنالاسىپ، ازيا مەن ەۋروپا اراسىنداعى سەنىمدى سەرىكتەس جانە ترانزيتتىك كوپىر ەكەنىن ەسكە سالدى.
ول سونداي-اق «كولىك جانە لوگيستيكا» كورمەسى ءىس-شاراعا قاتىسۋشىلار مەن قوناقتاردىڭ ۇزاق مەرزىمدى جانە ءوزارا ءتيىمدى سەرىكتەستىك قاتىناستارىن نىعايتۋ ءۇشىن پايدالى بولاتىنىنا سەنىم ءبىلدىردى. ەستەرىڭىزگە سالا كەتەيىك، قازاقستاندىق كولىك اپتالىعى اياسىندا الۋان ءتۇرلى ىسكەرلىك باعدارلاما جوسپارلانعان.
باعدارلاما بارىسىندا New Silk Way VI حالىقارالىق كولىك-لوگيستيكالىق بيزنەس-فورۋمى جانە «قازاقستانداعى قويما لوگيستيكاسى نارىعى»، «كاسپيي تەڭىزىندەگى پورتتاردى، تەرمينالداردى جانە كەمە قاتىناسىن دامىتۋ» جانە «كولىك جانە لوگيستيكا نارىعى» كونفەرەنسيالارىن وتكىزۋ كوزدەلىپ وتىر.
بيزنەس-فورۋمدا ساراپشىلار مەن قاتىسۋشىلار كولىك جۇيەلەرىنىڭ ىنتىماقتاستىعى مەن ينتەگراسياسى، ورتا ءدالىز باعىتىن دامىتۋ، سونداي-اق مۋلتيمودالدى تاسىمالداۋ سالاسىنداعى جاڭا تەحنولوگيالار مەن يننوۆاسيالار، جۇكتەردى تاسىمالداۋ تيىمدىلىگىن ارتتىرۋ جانە جەتكىزۋ جاعدايلارىن جاقسارتۋ ماسەلەلەرىن تالقىلايدى.
ىسكەرلىك باعدارلامادان باسقا سالالىق مينيسترلىكتەر، ۆەدومستۆولار، قاۋىمداستىقتار مەن حالىقارالىق كومپانيالار باسشىلىعىنىڭ قاتىسۋىمەن ەكىجاقتى كەزدەسۋلەر مەن كەلىسسوزدەر جوسپارلانعان.
ق ر كولىك مينيسترلىگىنىڭ باسپا ءسوز قىزمەتى
