استاناداعى اۆتوبۋس اپاتىندا ەكى اياعىنان ايىرىلعان الۋا بەكەننىڭ جاقىندارى مالىمدەمە جاسادى، دەپ حابارلايدى Dalanews.kz.
استاناداعى اۆتوبۋس اپاتىنان ەكى اياعىنان ايىرىلعان 7 جاسار الۋانىڭ جاقىندارى №1 اۆتوپارك باسشىلىعىمەن كەزدەسۋدەن كەيىن رەسمي مالىمدەمە جاسادى. ولار بۇل اڭگىمەنىڭ ەموسيالىق تۇرعىدا وتە اۋىر وتكەنىن اتاپ ءوتتى.
"بۇگىن ءبىز №1 اۆتوپاركتىڭ باسقارما ءتوراعاسى ماديار تۇكپاتوۆپەن وتە اۋىر ءارى تولعاندىرارلىق كەزدەسۋ وتكىزدىك. ونىڭ ءبىزدىڭ وتباسىمىزدىڭ قايعىسىنا، الۋاعا شىنايى جاناشىرلىقپەن قاراعانىنا كۋا بولدىق"، – دەدى الۋانىڭ اعالارىنىڭ ءبىرى.
ولاردىڭ ايتۋىنشا، اۆتوپارك باسشىسى جول-كولىك وقيعاسى ءۇشىن جاۋاپكەرشىلىكتەن جالتارمايتىنىن جەتكىزگەن. «ماديار تۇكپاتوۆ الۋا مەن ماحابباتتىڭ تاعى ءتورت بالاسىنىڭ ءومىر بويعى لايىقتى ءومىر سۇرۋىنە قاجەت بارلىق شىعىندى №1 اۆتوپارك ءوز موينىنا الاتىنىن ۋادە ەتتى»، – دەيدى تۋىستارى.
ءقازىر وتباسى زاڭگەرلەر مەن ەكونوميستەردى تارتقان. ولار ينفلياسيانى ەسكەرە وتىرىپ، الۋا مەن وتباسىنىڭ ءومىر بويعى شىعىندارىن ەسەپتەپ جاتىر.
"كەلىسىمدى زاڭدى تۇردە قالاي راسىمدەيمىز جانە اكىمدىكتىڭ بۇل ىسكە ناقتى ارالاسۋى قانداي بولادى – ونى الداعى ۋاقىتتا بولىسەتىن بولامىز"، – دەپ مالىمدەدى ولار.
الۋانىڭ تۋىستارى بارشا قازاقستاندىقتارعا جۇرەكجاردى العىس ءبىلدىردى.
"ءبىزدىڭ بۇكىل وتباسىمىز وسى تراگەديادان سىرت اينالماي، قولداۋ بىلدىرگەن اربىرىڭىزگە شىن جۇرەكتەن العىس ايتادى. لايك باسقان، رەپوست جاساعان، پىكىر جازعان، جەكە حابارلاما جولداعان جانداردىڭ بارىنە ريزامىز"، – دەلىنگەن مالىمدەمەدە.
ولار الۋا مەن ونىڭ وتباسى ءۇشىن دۇعا ەتىپ، جاقىندارىمەن بولىسكەن، قارجىلاي جانە زاتتاي كومەك كورسەتكەن بارشا حالىقتىڭ جۇرەگى ەلجىرەگەنىن سەزىنگەندەرىن ايتتى. «ماحابباتتىڭ تۇندە جىلاپ، كۇندىز مەيلىنشە سابىرلى كورىنۋگە تىرىسقانىنىڭ كۋاسىمىز»، – دەدى ولار.
"سىزدەردىڭ ءارقايسىڭىزدىڭ قولداۋلارىڭىزدىڭ ارقاسىندا ءبىز الۋاعا بارىنشا جايلى بولاشاقتى زاڭدى تۇردە راسىمدەۋگە كىرىستىك. بۇكىل وتباسىمىزدىڭ اتىنان سىزدەرگە تاعزىم ەتەمىز!"، – دەپ تۇيىندەدى ولار.
سونىمەن قاتار وتباسى مۇشەلەرى كولىك قاۋىپسىزدىگىنە قاتىستى بارلىق ماسەلەنى اۆتوپارك پەن اكىمدىك الدىنا قوياتىنىن دا ءمالىم ەتتى.
ايتا كەتەيىك، بۇعان دەيىن استاناداعى اۆتوبۋس اپاتىنان اياعىنان ايىرىلعان 7 جاستاعى قىزدىڭ جاعدايىنا بايلانىستى اعاسى مالىمدەمە جاساعان ەدى.
اعاسىنىڭ ايتۋىنشا، الۋا كۇندىز-تۇنى كوز ىلمەيدى، تىنىش ۇيقىدان ايىرىلعان.
"مۇلدەم ۇيىقتامايدى. كۇندىز دە، تۇندە دە مازاسى جوق. ازداپ تىنىقسىن دەپ ءدارى بەرۋگە تۋرا كەلەدى. كوز جاسىن تىيماي، ۇنەمى “اياعىم قايدا؟” دەپ سۇرايدى. بۇل سۇراعى جۇرەكتى قاق ايىرىپ، جانىمىزعا باتادى. جالپى مەديسينالىق جاعدايى – ءبىرقالىپتى"، – دەپ جازادى ول.
الۋانىڭ ءحالىن بالالار ومبۋدسمەنى دينارا زاكييەۆا دا ارنايى بارىپ ءبىلدى.
"الۋاشپەن جانە اناسىمەن جولىقتىق. پروتەزدەۋ مەن وڭالتۋ جايىن تالقىلادىق. قىزىمىزبەن سىرلاسىپ، كىتاپ وقىدىق. ءبىراز پيسسا جەدى، ۇنەمى “مەنى كوتەرىپ ءجۇرشى” نەمەسە “دالاعا شىعايىقشى” دەپ سۇراي بەرەدى"، – دەدى ومبۋدسمەن.
دينارا زاكييەۆا بۇل وتباسىنىڭ جاعدايى استانا قالاسىنىڭ اكىمى جەڭىس قاسىمبەكتىڭ تىكەلەي باقىلاۋىندا ەكەنىن دە اتاپ ءوتتى.
ەسكە سالا كەتەيىك، بۇعان دەيىن ەلوردادا جولاۋشىلار اۆتوبۋسى اپاتقا ۇشىراپ، بىرنەشە ادام جاراقات العان بولاتىن. الۋا – سول اپاتتىڭ ەڭ اۋىر زارداپ شەككەن جولاۋشىلارىنىڭ ءبىرى.
