تاريح پانىنەن ءدارىس بەرەتىن ءبىر ۇستاز ءوز مەكتەبىنە الاش ارىسى احمەت بايتۇرسىن ۇلىنىڭ ەسىمىن بەرۋ تۋرالى ۇسىنىس جاساعىسى كەلەتىنىن ايتتى. مۇنداي ۇتىمدى ۇسىنىستىڭ ۇلتتىق مىنەزدى مەكتەپ ءمۇعالىمىنىڭ جۇرەگىنەن شىققانىن ەستىپ، مارقايىپ قالدىق.
تاعى ءبىر ۇلتشىل ءمۇعالىم الماتىداعى م. ماقاتايەۆ اتىنداعى مەكتەپتەن اۋىسىپ كەلگەن وقۋشىنىڭ جىر جامپوزىنىڭ ەسىمىن زور ماقتانىشپەن ايتاتىنىن مىسالعا كەلتىردى. قالالىق ءبىلىم باسقارماسىنىڭ قىزمەتكەرى، قايراتكەر-ۇستاز دايرا كاينەم قىزى باس قالاداعى 84 مەكتەپتىڭ جەتەۋى عانا ۇلتتىق تۇلعالار ەسىمىن يەلەنگەنىن ءمالىم ەتتى.
استاناداعى كوپ مەكتەپتەر №38، 56، 72 دەگەن نومىرلەرمەن اتالاتىنىنا كوزىمىز جەتتى. سانانى وتارسىزداندىرۋدى وسى جەردەن باستاعان ءجون. تاريحي ادىلدىككە جۇگىنسەك، ازاتتىعىمىزدىڭ باستاۋىندا تۇرعان الاش ارىستارىنىڭ ەسىمدەرىن وسى مەكتەپتەرگە نەگە بەرمەيمىز؟
جاس ۇرپاقتى تاۋەلسىز سانامەن وسىرىپ-تاربيەلەيمىز دەسەك، وسى ءىستى بۇگىننەن باستاپ قولعا الۋ قاجەت. ۇستازدار مەكتەپ وقۋلىعىندا تام-تۇمداپ قانا جازىلعان جەلتوقسان ۇلت-ازاتتىق كوتەرىلىسى تاقىرىبىنا ەرەكشە قىزىعۋشىلىق تانىتتى. سونداي-اق، «ءبىلىم ۇياسىندا» وقىپ جۇرگەن تالانتتى، قابىلەتتى وقۋشىلاردى ۇلتتىق جۋرناليستيكاعا، ادەبيەتكە باۋلۋ، تالانتتى ۇل-قىزداردىڭ باعىن اشۋ تۋرالى دا تۇشىمدى ويلار ايتىلدى.
الاش قايراتكەرلەرىن ارداقتاساق، جاس ۇرپاقتىڭ ۇلتتىق ساناسى قالىپتاسادى. ال ءوزىنىڭ اتا تاريحىن بىلگەن ەلدىڭ بالاسى سانالى، ورەلى، وتانشىل، ۇلتشىل بولىپ وسەدى. ەندەشە، بىزدە ۇلتتىق مىنەزدى، ۇلتتىق رۋحتى ۇستازدار كوبەيە بەرسىن!
تولەن تىلەۋباي، جۋرناليست.
(جازبا اۆتوردىڭ “فەيسبۋكتاعى” پاراقشاسىنان الىندى)
