قازاقستانداعى ۋكراينا ەلشىلىگى جىل سايىن 6 جەلتوقساندا اتاپ وتىلەتىن ۋكراينا قارۋلى كۇشتەرى كۇنىن مەرەكەلەدى. بۇل تۋرالى ەلشى ۆيكتور مايكو ءوز پاراقشاسىندا حابارلادى، دەپ جازادى Dalanews.kz.
«6 جەلتوقسان، ۋكراينا قارۋلى كۇشتەرى كۇنى – سوعىس جىلدارىنداعى ءاربىر كۇن ءتارىزدى ءبىزدىڭ بارلىق ويىمىز العىسقا تولى. ءبىز بۇل كۇندى ءوز قورعاۋشىلارىمىزعا ارنايمىز»، – دەپ جازدى ديپلومات.
ونىڭ ايتۋىنشا، ەلشىلىك ۇجىمى بۇل كۇندى وتانداستارىمەن بىرگە ەسكە الۋ ءۇشىن جينالعان. مايكو ارىپتەستەرىنە جولداعان سوزىندە ۋكراينانىڭ تاريحى - ەركىندىك، تاۋەلسىزدىك جانە ءوز جەرىندە ءومىر ءسۇرۋ قۇقىعى ءۇشىن كۇرەس ەكەنىن اتاپ ءوتتى. سونداي-اق قازىرگى اسكەردىڭ ءداستۇرى ۋكراين كازاكتارىنىڭ اسكەري مۇراسىمەن بايلانىستى ەكەنىن جەتكىزدى.
ۋكراينا قارۋلى كۇشتەرى 1991 جىلى قۇرىلعان. اسكەردىڭ بەلسەندى جاڭعىرۋى 2014 جىلعى وقيعالاردان كەيىن باستالدى، ال 2022 جىلدان بەرى ۋكراينا قارۋلى كۇشتەرى تولىققاندى سوعىس جاعدايىندا نەگىزگى قارسىلىق كۇشى رەتىندە ارەكەت ەتىپ كەلەدى.
