قما استانا قالاسى بويىنشا دەپارتامەنتى «Qyran» تۇرعىن ءۇي كەشەنىندەگى جىلجىمايتىن مۇلىكتى ساتۋ جەلەۋىمەن اقشا قاراجاتىن جىمقىرۋ سحەماسىن ۇيىمداستىرعان قۇرىلىس كومپانياسىنىڭ قىزمەتكەرلەرىنە قاتىستى تەرگەۋ جۇرگىزۋدە، دەپ حابارلايدى Dalanews.kz.
ساتۋ كەڭسەسىندە قۇرىلىس كومپانياسى اتىنان ساتىپ الۋشىلارعا كومپانيانىڭ جىلجىمايتىن مۇلىك نىساندارىنا مەنشىك قۇقىعى بار ەكەنىن «دالەلدەيتىن» ماكەتتەر، تەحنيكالىق پاسپورتتار، سەنىمحاتتار مەن انىقتامالار كورسەتىلگەن.
ازاماتتارعا پاتەرلەردى، كوممەرسيالىق ءۇي-جايلاردى جانە پاركينگ ورىندارىن نارىقتىق باعادان تومەن ساتىپ الۋ ۇسىنىلىپ، مامىلەلەردىڭ تولىق زاڭدى ەكەنى ايتىلعان.
الايدا ساتىپ الۋ-ساتۋ شارتتارىن جاساۋ ورنىنا كۇدىكتىلەر برونداۋ شارتتارىن، كەپىل تۋرالى كەلىسىمدەر مەن الدىن الا شارتتاردى راسىمدەگەن. بۇل قۇجاتتار مەملەكەتتىك تىركەۋگە جاتپايدى جانە ساتىپ الۋشىلارعا مەنشىك قۇقىعىن بەرمەيدى.
جابىرلەنۋشىلەر تولەمدى قولما-قول جانە قولما-قول اقشاسىز تۇردە سحەمانىڭ قاتىسۋشىلارىنىڭ جەكە شوتتارىنا اۋدارعان. «International Invest Company IIC» ءجشس-نىڭ بۋحگالتەرلىك جانە بانكتىك قۇجاتتارىندا بۇل وپەراسيالار كورسەتىلمەگەن.
ناتيجەسىندە ازاماتتاردىڭ 3،8 ملرد تەڭگەدەن استام قاراجاتى جىمقىرىلعان.
بۇدان بولەك، كۇدىكتىلەر قۇرىلىس كومپانياسىنىڭ قاراجاتىن ۇرلاۋعا باعىتتالعان ەكىنشى الاياقتىق سحەمانى جۇزەگە اسىرعان.
قۇرىلىس كومپانيانىڭ اتىنان كليەنتتەرمەن جالعان ساتىپ الۋ-ساتۋ شارتتارىن جاساپ، وبەكتىلەرگە مەنشىك قۇقىقتارىن تىركەگەن، الايدا ساتۋدان تۇسكەن قاراجات كومپانيانىڭ كاسساسىنا تۇسپەگەن.
76 جىلجىمايتىن مۇلىك وبەكتىسىنىڭ ساتىلۋىنان 4،1 ملرد تەڭگە جىمقىرىلعان.
وسىلايشا ازاماتتارعا جانە كومپانياعا كەلتىرىلگەن جالپى زالال 7،9 ملرد تەڭگەنى قۇرادى.
سوت سانكسياسىمەن 94 پاتەرگە، 51 پاركينگ ورنىنا، 8 كوممەرسيالىق ءۇي-جايعا جانە ءبىر اۆتوكولىككە تىيىم سالىندى.
ءۇش كۇدىكتىگە قاتىستى قاماۋعا الۋ تۇرىندەگى بۇلتارتپاۋ شاراسى قولدانىلدى.
