ەلوردادا ۆانداليزم ارەكەتتەرى مەن قوعامدىق ءتارتىپتى بۇزۋشىلىقتارعا قارسى جۇيەلى كۇرەس جۇرگىزىلۋدە. كەزەكتى ءتارتىپ بۇزۋشىلاردى پوليسەيلەر انىقتاپ، جازالادى،- دەپ حابارلايدى Dalanews.kz

بايقوڭىر اۋدانىنداعى ءۋاليحانوۆ كوشەسىندە بەلگىسىز ادامدار ايالداما پاۆيلونىنىڭ تەرەزەسىن سىندىرعان. تەكسەرۋ بارىسىندا كۇدىكتى انىقتالدى، ول – 37 جاستاعى ەر ادام. ونىڭ ماس كۇيىندە قالا مۇلكىن ادەيى بۇلدىرگەنى بەلگىلى بولدى. سوت شەشىمىمەن قۇقىق بۇزۋشى 10 تاۋلىككە قاماۋعا الىندى.

جىل باسىنان بەرى 160 ادام اكىمشىلىك جاۋاپكەرشىلىككە تارتىلدى، ونىڭ ىشىندە 93ء-ى قاماۋعا الىنىپ، 67 ادامعا جالپى سوماسى 10 466 780 تەڭگە ايىپپۇل سالىندى.

ايتا كەتەيىك، قالا مۇلكىن بۇلدىرگەنى ءۇشىن زاڭ بويىنشا جاۋاپكەرشىلىك قاراستىرىلعان. ايالدامالاردى، ورىندىقتاردى، شاعىن ساۋلەت نىساندارىن جانە باسقا دا ينفراقۇرىلىم نىساندارىن زاقىمداۋ قالاعا شىعىن كەلتىرىپ قانا قويماي، تۇرعىنداردىڭ جايلى ومىرىنە كەدەرگى جاسايدى.

وتكەن جىلدان بەرى استانادا «ستوپ، ۆاندال» اكسياسى اياسىندا پروفيلاكتيكالىق جۇمىس جۇرگىزىلىپ كەلەدى. بۇل باستامانى ەرىكتىلەر، بەلسەندىلەر، تانىمال سپورتشىلار جانە قالا تۇرعىندارى قولدادى.

اكسيانىڭ ماقساتى – ءۆانداليزمنىڭ كەز كەلگەن كورىنىسىنە جول بەرمەۋ جانە ەلوردادا تازالىق پەن ءتارتىپتى ساقتاۋ.

«زاڭ جانە ءتارتىپ» قاعيداتى اياسىندا قالالىق پوليسيا پروكۋراتۋرامەن بىرلەسە وتىرىپ ۆانداليزمگە قارسى بەلسەندى جۇمىس جۇرگىزىپ كەلەدى.

بوتەننىڭ مۇلكىن قاساقانا جويۋ نەمەسە ءبۇلدىرۋ 60 اەك-كە دەيىنگى ايىپپۇلمەن نە 30 تاۋلىككە دەيىنگى قاماۋمەن جازالانادى.