"كۇيشىلەر اللەياسى" مۋزىكالىق اللەياسىنىڭ تاس مەموريالىندا كورنەكتى كومپوزيتورلاردىڭ جۇزدەن استام ەسىمدەرى جازىلعان.
ولاردىڭ بارلىعى-قازاق حالقىنىڭ كۇيلەرىن شىعارعان جانە ورىنداعان تالانتتى مۋزىكانتتار. ەسكەرتكىش ەلورداداعى دومبىراشىلاردىڭ جاڭا اللەياسىن بەزەندىرەدى. قالا تۇرعىندارى ءۇشىن دەمالىس ورنى رەسپۋبليكا كۇنىنە ارنايى دايىندالدى.
– بۇل تاستىڭ سالماعى شامامەن 12 توننا. الماتىدان وسىندا الىپ كەلۋ، بۇل ۇلكەن ەڭبەك بولدى. مۇندا ءمارمار تاسقا 101 ادامنىڭ ەسىمى جازىلعان. بۇل كۇيشىلەر، ونەر سالاسىنداعى ەڭبەگىمەن قازاق حالقىنىڭ قۇرمەتىنە قول جەتكىزگەن ءبىزدىڭ اتالارىمىز، – دەيدى "كۇي اناسى" رەسپۋبليكالىق قورىنىڭ باسشىسى تولەگەن قۋانىشيەۆ.
كۇيشىلەردىڭ ءتىزىمىن قۇرمانعازى اتىنداعى الماتى كونسەرۆاتورياسىنىڭ ارنايى عىلىمي توبى قۇردى. ءار مۋزىكانتتىڭ ءومىربايانىن، ونىڭ قازاق مادەنيەتىنە قوسقان ۇلەسىن زەرتتەدى. قوعام قايراتكەرلەرى مۇنداي ەسكەرتكىشتەر باسقا قالالاردا دا اشىلادى دەپ ۋادە بەرۋدە.
– بۇل ءبىزدىڭ ۇلى اسپابىمىز – دومبىراعا دەگەن قۇرمەت. دومبىرا – بۇل جاي عانا مۋزىكالىق اسپاپ ەمەس، ول قازاق حالقىنىڭ تاريحى. عاسىرلار بويى دومبىرانىڭ ىشەگىنەن شىققان مۋزىكا ادامدارعا قيىندىقتاردى جەڭۋگە، جاقسىلىق جاساۋعا كومەكتەستى. مەنىڭ ويىمشا، اللەيانىڭ اشىلۋى – وسكەلەڭ ۇرپاقتى تاربيەلەۋ، – دەيدى استانا قالاسى قوعامدىق كەڭەسىنىڭ مۇشەسى مارات مۇستافين.
مەموريال تاقتا كومپوزيتور دينا نۇرپەيىسوۆانىڭ ەسكەرتكىشىنە جاقىن جەردە ورناتىلدى. "كۇيشىلەر اللەياسى" دەگەن سيمۆولدىق اتاۋ بەرىلگەن بۇل الاڭدا جاقىن ارادا مۋزىكالىق سۋبۇرقاق پەن جازعى امفيتەاتر ورناتىلادى. يدەيا بويىنشا، اللەيا حالىق ونەرىنىڭ ورتالىعىنا اينالۋى كەرەك.
