Elordada ataqty kúıshi Dına Nurpeıisova eskertkishiniń janynda mýzykanttar aleıasy ashyldy, onda dombyra, qobyz, sybyzǵy oınaǵan júzdegen aty ańyzǵa aınalǵan kúıshi-mýzykanttardyń esimderi jazylǵan erekshe memorıal ornatyldy, – dep habarlaıdy Dalanews.kz Astana ákimdiginiń resmı saıtyne silteme jasap.

"Kúıshiler aleıasy" mýzykalyq aleıasynyń tas memorıalynda kórnekti kompozıtorlardyń júzden astam esimderi jazylǵan.

Olardyń barlyǵy-qazaq halqynyń kúılerin shyǵarǵan jáne oryndaǵan talantty mýzykanttar. Eskertkish elordadaǵy dombyrashylardyń jańa aleıasyn bezendiredi. Qala turǵyndary úshin demalys orny Respýblıka kúnine arnaıy daıyndaldy.

– Bul tastyń salmaǵy shamamen 12 tonna. Almatydan osynda alyp kelý, bul úlken eńbek boldy. Munda mármár tasqa 101 adamnyń esimi jazylǵan. Bul kúıshiler, óner salasyndaǵy eńbegimen qazaq halqynyń qurmetine qol jetkizgen bizdiń atalarymyz, – deıdi "Kúı anasy" respýblıkalyq qorynyń basshysy Tólegen Qýanyshev.

Kúıshilerdiń tizimin Qurmanǵazy atyndaǵy Almaty konservatorıasynyń arnaıy ǵylymı toby qurdy. Ár mýzykanttyń ómirbaıanyn, onyń qazaq mádenıetine qosqan úlesin zerttedi. Qoǵam qaıratkerleri mundaı eskertkishter basqa qalalarda da ashylady dep ýáde berýde.

– Bul bizdiń uly aspabymyz – dombyraǵa degen qurmet. Dombyra – bul jaı ǵana mýzykalyq aspap emes, ol qazaq halqynyń tarıhy. Ǵasyrlar boıy dombyranyń isheginen shyqqan mýzyka adamdarǵa qıyndyqtardy jeńýge, jaqsylyq jasaýǵa kómektesti. Meniń oıymsha, aleıanyń ashylýy – óskeleń urpaqty tárbıeleý, – deıdi Astana qalasy Qoǵamdyq keńesiniń múshesi Marat Mustafın.

Memorıal taqta kompozıtor Dına Nurpeıisovanyń eskertkishine jaqyn jerde ornatyldy. "Kúıshiler aleıasy" degen sımvoldyq ataý berilgen bul alańda jaqyn arada mýzykalyq sýburqaq pen jazǵy amfıteatr ornatylady. Ideıa boıynsha, aleıa halyq óneriniń ortalyǵyna aınalýy kerek.