جەڭىستىڭ 80 جىلدىعىنا وراي استانادا اسكەري شەرۋ وتەدى. شەرۋدىڭ ۇيىمداستىرۋ جۇمىستارىنا بيۋدجەتتەن 2،5 ميلليارد تەڭگە بولىنبەك. بۇل تۋرالى بۇگىن قورعانىس مينيسترلىگى ءمالىم ەتتى، دەپ حابارلايدى Dalanews.kz.
قورعانىس مينيسترلىگى تاربيە جانە يدەولوگيالىق جۇمىستار دەپارتامەنتىنىڭ وكىلى، پولكوۆنيك ۆيتاليي اداموۆيچ مەملەكەتتىك بيۋدجەتتەن بولىنەتىن 2،5 ميلليارد تەڭگەنىڭ نەگە جۇمسالاتىنىن تىزبەكتەپ بەردى.
“بۇل قاراجات جانار-جاعارماي مەن قوسالقى بولشەكتەردى ساتىپ الۋعا، ءىسساپار شىعىندارىنا، اسكەرلەر قوزعالىسىنا جانە فورما تىگۋگە جۇمسالادى. اسكەري شەرۋ ءۇش كەزەڭنەن تۇرادى:
- ءبىرىنشى كەزەڭدە تاريحي جانە زاماناۋي بولىمنەن تۇراتىن جاياۋ شەرۋى ەكيپاجدارى ءجۇرىپ وتەدى؛
- ەكىنشى كەزەڭدە مەحانيكالىق تەحنيكا ءجۇرىپ وتەدى؛
- ءۇشىنشى كەزەڭدە اۆياسيا ۇشىپ وتەدى”، – دەدى ۆيتاليي اداموۆيچ.
سونداي-اق العاش رەت الاڭدا قازاقستان اۋماعىندا جاساقتالعان اسكەري بولىمدەر – 23 ديۆيزيا مەن بريگادالاردىڭ جاۋىنگەرلىك تۋلارى مەن اسكەري تاريح مۇراجايىندا ساقتالعان ت-34 تانكىندەگى جەڭىس تۋىنىڭ كوشىرمەسىن الىپ وتەدى.
شەرۋ كەزىندە سوڭعى جىلدارى ساتىپ الىنعان قارۋ-جاراق پەن اسكەري تەحنيكانىڭ سوڭعى ۇلگىلەرى دە كورسەتىلەدى. شەرۋگە بارلىعى 4،5 مىڭعا جۋىق ادام قاتىسادى.
