Jeńistiń 80 jyldyǵyna oraı Astanada áskerı sherý ótedi. Sherýdiń uıymdastyrý jumystaryna búdjetten 2,5 mıllıard teńge bólinbek. Bul týraly búgin Qorǵanys mınıstrligi málim etti, dep habarlaıdy Dalanews.kz.
Qorǵanys mınıstrligi Tárbıe jáne ıdeologıalyq jumystar departamentiniń ókili, polkovnık Vıtalıı Adamovıch memlekettik búdjetten bólinetin 2,5 mıllıard teńgeniń nege jumsalatynyn tizbektep berdi.
“Bul qarajat janar-jaǵarmaı men qosalqy bólshekterdi satyp alýǵa, issapar shyǵyndaryna, áskerler qozǵalysyna jáne forma tigýge jumsalady. Áskerı sherý úsh kezeńnen turady:
- Birinshi kezeńde tarıhı jáne zamanaýı bólimnen turatyn jaıaý sherýi ekıpajdary júrip ótedi;
- Ekinshi kezeńde mehanıkalyq tehnıka júrip ótedi;
- Úshinshi kezeńde avıasıa ushyp ótedi”, – dedi Vıtalıı Adamovıch.
Sondaı-aq alǵash ret alańda Qazaqstan aýmaǵynda jasaqtalǵan áskerı bólimder – 23 dıvızıa men brıgadalardyń jaýyngerlik týlary men Áskerı tarıh murajaıynda saqtalǵan T-34 tankindegi Jeńis týynyń kóshirmesin alyp ótedi.
Sherý kezinde sońǵy jyldary satyp alynǵan qarý-jaraq pen áskerı tehnıkanyń sońǵy úlgileri de kórsetiledi. Sherýge barlyǵy 4,5 myńǵa jýyq adam qatysady.
