استاناداعى قىلمىستىق ىستەر جونىندەگى مامانداندىرىلعان اۋدانارالىق سوت ەكى ازاماتتى ءىرى كولەمدەگى قارجى جىمقىرۋ ءىسى بويىنشا ايىپتى دەپ تانىپ، ۇكىم شىعاردى. ولار «سامۇرىق-ەنەرگو» اق-نىڭ ەنشىلەس كومپانياسىنا تيەسىلى 8،5 ميلليارد تەڭگەدەن استام قارجىنى زاڭسىز يەمدەنگەن، دەپ حابارلايدى Dalanews.kz.
سوت مالىمەتىنشە، 2020–2022 جىلدار ارالىعىندا ايىپتالۋشىلار ءۇشىنشى تۇلعامەن الدىن الا ءسوز بايلاسىپ، ەرەيمەنتاۋ قالاسىندا سالىنۋى ءتيىس جەل ەلەكتر ستانسياسىنىڭ جوباسىنا بولىنگەن قارجىنى ۇرلاعان. ولار بۇل قارجىنى جالعان كەلىسىمشارتتار مەن وزدەرىنە باعىنىشتى كومپانيالار ارقىلى جىمقىرعان.
سونىمەن قاتار، ايىپتالۋشىلاردىڭ ءبىرى ب. اكسيونەرلىك قوعاممەن ترانسفورماتورلىق قوسالقى ستانسيالار جەتكىزۋگە كەلىسىم جاساسقانىمەن، كەلىسىلگەن مىندەتتەمەلەردى ورىنداماعان. ناتيجەسىندە كومپانياعا 157 ميلليون تەڭگەدەن استام شىعىن كەلتىرىلگەن.
سوتتا ب.-عا قاتىستى قانداي دا ءبىر جەڭىلدەتەتىن نەمەسە اۋىرلاتاتىن ءمان-جايلار بولماعانى، ال م.-نىڭ ەكى كىشكەنتاي بالاسى بار ەكەنى جانە بۇرىن سوتتالماعانى ەسكەرىلگەن.
ناتيجەسىندە، سوت ب.-نى 8 جىل 6 ايعا باس بوستاندىعىنان ايىرىپ، وعان بەرىلگەن «قۇرمەت» وردەنىن كەرى قايتاردى. ال م.-عا قاتىستى قىلمىستىق كودەكستىڭ 55-بابى 2-بولىگىنىڭ 2-تارماعىن قولدانىپ، وعان 6 جىل 8 اي جازا تاعايىندادى. بۇل باپ ناقتى قىلمىسقا قاراعاندا جەڭىلىرەك جازا قولدانۋعا مۇمكىندىك بەرەدى.
سونىمەن قاتار، توو «ە» كومپانياسىنىڭ ازاماتتىق تالابى ءىشىنارا قاناعاتتاندىرىلىپ، 8،5 ميلليارد تەڭگە جانە 3 ميلليون تەڭگە سوت شىعىنى وندىرىلەتىن بولدى.
