Astanadaǵy qylmystyq ister jónindegi mamandandyrylǵan aýdanaralyq sot eki azamatty iri kólemdegi qarjy jymqyrý isi boiynsha aiypty dep tanyp, úkim shyǵardy. Olar «Samuryq-Energo» AQ-nyń enshiles kompaniiasyna tiesili 8,5 milliard teńgeden astam qarjyny zańsyz iemdengen, dep habarlaidy Dalanews.kz.
Sot málimetinshe, 2020–2022 jyldar aralyǵynda aiyptalýshylar úshinshi tulǵamen aldyn ala sóz bailasyp, Ereimentaý qalasynda salynýy tiis jel elektr stantsiiasynyń jobasyna bólingen qarjyny urlaǵan. Olar bul qarjyny jalǵan kelisimsharttar men ózderine baǵynyshty kompaniialar arqyly jymqyrǵan.
Sonymen qatar, aiyptalýshylardyń biri B. aktsionerlik qoǵammen transformatorlyq qosalqy stantsiialar jetkizýge kelisim jasasqanymen, kelisilgen mindettemelerdi oryndamaǵan. Nátijesinde kompaniiaǵa 157 million teńgeden astam shyǵyn keltirilgen.
Sotta B.-ǵa qatysty qandai da bir jeńildetetin nemese aýyrlatatyn mán-jailar bolmaǵany, al M.-nyń eki kishkentai balasy bar ekeni jáne buryn sottalmaǵany eskerilgen.
Nátijesinde, sot B.-ny 8 jyl 6 aiǵa bas bostandyǵynan aiyryp, oǵan berilgen «Qurmet» ordenin keri qaitardy. Al M.-ǵa qatysty Qylmystyq kodekstiń 55-baby 2-bóliginiń 2-tarmaǵyn qoldanyp, oǵan 6 jyl 8 ai jaza taǵaiyndady. Bul bap naqty qylmysqa qaraǵanda jeńilirek jaza qoldanýǵa múmkindik beredi.
Sonymen qatar, TOO «E» kompaniiasynyń azamattyq talaby ishinara qanaǵattandyrylyp, 8,5 milliard teńge jáne 3 million teńge sot shyǵyny óndiriletin boldy.
