استانادا جەدەل جاردەمنىڭ جەتۋ باعىتىن ناقتى ۋاقىت رەجيمىندە قاداعالاۋعا ارنالعان پيلوتتىق سيفرلىق سەرۆيس ىسكە قوسىلدى، دەپ حابارلايدى Dalanews.kz
استانا قالاسىنىڭ اكىمدىگى جەدەل جاردەم قىزمەتىنىڭ قوزعالىسىن ناقتى ۋاقىت رەجيمىندە باقىلاۋعا مۇمكىندىك بەرەتىن جاڭا سيفرلىق سەرۆيس جوباسىن پيلوتتىق رەجيمدە ىسكە قوستى. بۇل باستاما دەنساۋلىق ساقتاۋ مينيسترلىگىنىڭ قولداۋىمەن، Yandex Qazaqstan، IT Space جانە 7Generation كومپانيالارىنىڭ سەرىكتەستىگىمەن جۇزەگە اسىرىلۋدا.
جاڭا شەشىم جەدەل قىزمەتتەردىڭ اشىقتىعىن ارتتىرىپ، تۇرعىنداردىڭ الاڭداۋشىلىعىن تومەندەتۋگە، سونداي-اق ءبىر شاقىرۋ بويىنشا قايتالاناتىن قوڭىراۋلار سانىن ازايتۋ ارقىلى ديسپەچەرلەرگە تۇسەتىن جۇكتەمەنى جەڭىلدەتۋگە باعىتتالعان.
1-ساناتتاعى (ەڭ شۇعىل) شاقىرتۋلار تىركەلگەننەن كەيىن ءوتىنىم بەرۋشىنىڭ تەلەفونىنا SMS-حابارلاما جىبەرىلەدى، وندا جەدەل جاردەم كولىگىنىڭ ناقتى باعىتىن باقىلاۋعا مۇمكىندىك بەرەتىن ينتەراكتيۆتى كارتانىڭ سىلتەمەسى كورسەتىلەدى.
پايدالانۋشى سىلتەمە ارقىلى ءوتىپ، جەدەل جاردەم بريگاداسىنىڭ قوزعالىسىن ونلاين باقىلاپ، ونىڭ جاقىنداپ كەلە جاتقانىن كورە الادى. فۋنكسيا ياندەكس كارتاسىنىڭ JavaScript API شەشىمى نەگىزىندە جۇزەگە اسىرىلدى.
قازىرگى تاڭدا بۇل فۋنكسيا استانا قالاسىندا تىركەلگەن كەيبىر 1-ساناتتاعى جەدەل شاقىرتۋلار ءۇشىن قولجەتىمدى. الداعى ۋاقىتتا بارلىق ساناتتاعى شاقىرتۋلاردى قامتۋ، سونداي-اق سەرۆيستى ەلىمىزدىڭ وزگە وڭىرلەرىندە ەنگىزۋ جوسپاردا بار.
زاماناۋي سيفرلىق شەشىمدەر دەنساۋلىق ساقتاۋ سالاسىنداعى اشىقتىق پەن سەنىمدىلىكتى ارتتىرىپ قانا قويماي، ازاماتتارعا جەدەل جاردەم كولىگىنىڭ كەلۋىنە الدىن الا دايىندالۋعا مۇمكىندىك بەرەدى (مىسالى، شلاگباۋمدى اشۋ نەمەسە پاسيەنتتىڭ قۇجاتتارىن دايىنداۋ)، سونىمەن قاتار ديسپەچەرلىك قىزمەتكە تۇسەتىن جۇكتەمەنى ازايتادى.
دەنساۋلىق ساقتاۋ سالاسىنداعى سيفرلىق ترانسفورماسيالاۋ جۇمىسى مەديسينالىق كومەكتىڭ ساپاسىن، قولجەتىمدىلىگىن جانە جەدەلدىگىن ارتتىرۋ ماقساتىندا جالعاسا بەرەدى.
