استانادا بەلگىسىز بىرەۋلەر 19 جاستاعى جىگىت مەدەتتى ءولتىرىپ، جوعارى قاباتتان لاقتىرىپ جىبەرگەن، - دەپ حابارلايدى Dalanews.kz. 

TikTok-تا "زا مەدەتا" اتتى پاراقشا پايدا بولعان. پاراقشادا مارقۇم جىگىتتىڭ تۋىستارى بۇل جايتقا قاتىستى اقپاراتتاردى سالىپ وتىرادى. 19 جاستاعى جىگىتتىڭ اناسى ۇندەۋ جاساپ، كىنالى ادامداردىڭ جازالانۋىن تالاپ ەتتى. 

ونىڭ سوزىنشە، ۇلىن 4 جىگىت ءولتىرىپ كەتكەن. 

"ءتورت جىگىت مەنىڭ بالامدى ءولىتىرىپ، 9-قاباتتان لاقتىرىپ جىبەرگەن. زاڭ قايدا؟ ەگەر بۇلاي جالعاسا بەرسە ەلىمىزدە جاستار قالمايدى عوي. مەنىڭ ءتورت بالام بار. بالام ىشپەيتىن، شەكپەيتىن، اكادەميادا وقيتىن. مەنى ەشكىم تىڭداعىسى كەلمەيدى. كىنالى ادامداردىڭ زاڭ بويىنشا جازالانعانىن قالايمىن"، - دەيدى مەدەتتىڭ اناسى. 

مارقۇم جىگىتتىڭ اينابەك ەسىمدى دوسى ZTB تىلشىلەرىنە سۇحبات بەرىپ،مەدەت سپورتپەن اينالىسقانىن، ەشقاشان شەگىپ نەمەسە ىشىمدىك ءىشىپ كورمەگەنىن ايتادى. 

"ول دوستارىمەن كەزدەسىپ، اراسىنداعى بىرەۋىنىڭ ۇيىندە وتىرعان. دوستارى مەدەتكە الكوگول ۇسىنا باستاعان، ءبىراق ول باس تارتقان"، - دەيدى اينابەك. 

اينابەكتىڭ سوزىنشە، مەدەتتى ولتىرگەندەر ول باس تارتقانىنا قاراماستان ونى ادەيى ماس قىلعان. ونىڭ سوزىنشە، مەدەت بۇعان دەيىن ىشىمدىك ىشپەگەندىكتەن تەز ماس بولىپ قالعان كورىنەدى. 

"جارتى ساعاتتان كەيىن ماس بولىپ قالعان. قالعان ءتورت دوسى وسىنى پايدالانىپ، ونىڭ اتىنا نەسيە الىپ تاستاعان. اقشانى الىپ، تورتەۋى ونى بالكونعا شىعارىپ، مەدەتتى جوعارى قاباتتان لاقتىرىپ جىبەرگەن"، - دەيدى اينابەك. 

بۇل دەرەككە قاتىستى استانانىڭ پوليسيا دەپارتامەنتى جاۋاپ بەردى. استانا پوليسياسى 19 جاستاعى ءجاسوسپىرىمنىڭ ءمايىتى تابىلعان سوڭ قىلمىستىق ءىس قوزعادى. 

"وقيعاعا قاتىسۋشىلار انىقتالدى. وقيعانىڭ ءمان-جايىن انىقتاۋ جۇمىستارى جۇرگىزىلىپ جاتىر. تەرگەۋ اياسىندا تاراپتاردىڭ، ونىڭ ىشىندە مارقۇمنىڭ اناسىنىڭ بارلىق ءۋاجى مەن مالىمدەمەسى مۇقيات تەكسەرىلەدى"، – دەپ حابارلادى پوليسيا.

بۇل ءىس استانا پوليسيا دەپارتامەنتى باستىعىنىڭ ەرەكشە باقىلاۋىندا.