ورتالىق كوممۋنيكاسيالار قىزمەتى الاڭىندا «بالالاردىڭ قاۋىپسىزدىگىن قامتاماسىز ەتۋ تۋرالى» تاقىرىبىندا باسپا ءسوز كونفەرەنسياسى ءوتتى، دەپ حابارلايدى Dalanews.kz.
بريفينگكە قازاقستان رەسپۋبليكاسى ىشكى ىستەر مينيسترلىگى اكىمشىلىك پوليسيا كوميتەتى ءتوراعاسىنىڭ ورىنباسارى عالىم سارعۇلوۆ قاتىستى.
Dala News ءتىلشىسىنىڭ بالالارعا قاتىستى زورلىق-زومبىلىق بويىنشا الەمدىك رەيتينگتەگى قازاقستاننىڭ ورنى تۋرالى ساۋالىنا جاۋاپ بەرگەن سپيكەر بۇل ماسەلەنى ءبىر عانا كورسەتكىشپەن باعالاۋ دۇرىس ەمەس ەكەنىن ايتتى.
ونىڭ سوزىنشە، حالىقارالىق ۇيىمداردىڭ دەرەكتەرىنە سايكەس، الەم بويىنشا ءاربىر ءۇشىنشى بالا ومىرىندە كەمىندە ءبىر رەت زورلىق-زومبىلىقتىڭ قانداي دا ءبىر تۇرىنە تاپ بولادى. الايدا ەلدەر اراسىنداعى ستاتيستيكانى سالىستىرۋدا ادىستەمەلىك ايىرماشىلىقتار بار.
«قازاقستاندى ناقتى ءبىر الەمدىك رەيتينگتەگى ورىنمەن باعالاۋ قيسىندى ەمەس. سەبەبى ءار ەلدە قۇقىقتىق انىقتامالار مەن ەسەپ جۇرگىزۋ تاسىلدەرى ءارتۇرلى. سوڭعى جىلدارى بىزدە تىركەۋ جۇيەسى سيفرلاندىرىلىپ، اشىقتىق ارتتى. بۇل كەي جاعدايدا ستاتيستيكانىڭ ءوسۋى رەتىندە كورىنۋى مۇمكىن، ءبىراق شىن مانىندە جاسىرىن قۇقىق بۇزۋشىلىقتاردى انىقتاۋ دەڭگەيى ارتقانىن بىلدىرەدى»، – دەدى عالىم سارعۇلوۆ.
ول ءىىم تاراپىنان مەكتەپتەر مەن بالاباقشالار ماڭىنداعى قاۋىپسىزدىك شارالارى كۇشەيتىلىپ، يۋۆەنالدى پوليسيا جۇمىسى جانداندىرىلعانىن، سونداي-اق تۇرمىستىق زورلىق-زومبىلىققا قارسى زاڭنامالىق تەتىكتەر قاتاڭداتىلعانىن اتاپ ءوتتى.
سونداي-اق Dala News ءتىلشىسى بالالار قۇقىعىن قورعايتىن ومبۋدسمەننىڭ جۇمىسىنا قاتىستى پىكىرىن سۇرادى.
بۇل سۇراققا جاۋاپ بەرگەن سپيكەر قازاقستان رەسپۋبليكاسىنداعى بالا قۇقىقتارى جونىندەگى ۋاكىل ينستيتۋتى بالالاردىڭ قۇقىقتارىن قورعاۋدا ماڭىزدى ينستيتۋت ەكەنىن ايتتى.
«ىشكى ىستەر ورگاندارى ۋاكىل اپپاراتىمەن تۇراقتى تۇردە ءوزارا ءىس-قيمىل جاسايدى. بالالارعا قارسى قىلمىستار ءۇشىن جاۋاپكەرشىلىكتى كۇشەيتۋ جانە الدىن الۋ تەتىكتەرىن جەتىلدىرۋ بويىنشا ءبىرقاتار باستامالار بىرلەسىپ قارالۋدا»، – دەدى ول.
سونىمەن قاتار، ونىڭ ايتۋىنشا، كەز كەلگەن مەملەكەتتىك جانە قوعامدىق ينستيتۋت سياقتى بۇل باعىتتاعى جۇمىس تا تۇراقتى تۇردە جەتىلدىرۋدى قاجەت ەتەدى. قوعام تاراپىنان ايتىلاتىن سىن مەن ۇسىنىستار قالىپتى ۇدەرىس رەتىندە قابىلدانادى.
بريفينگ قورىتىندىسىندا بالالاردىڭ قاۋىپسىزدىگى تەك ءبىر ورگاننىڭ ەمەس، بۇكىل قوعامنىڭ ورتاق جاۋاپكەرشىلىگى ەكەنى اتاپ ءوتىلدى.
