استانادا وزىنەن كىشى بالاعا ليفتتە پىشاق الا جۇگىرىپ، بەتىن تىلگەن بالاعا قاتىستى تىڭ دەرەكتەر بەلگىلى بولدى، دەپ حابارلايدى Dalanews.kz.
سوت مالىمەتىنشە، استانا قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنا 14 جاستاعى ك.- گە قاتىستى مەديسينالىق سيپاتتاعى ماجبۇرلەۋ شارالارىن قولدانۋ تۋرالى قاۋلىسى بار قىلمىستىق ءىس تۇسكەن.
سوت ك.-نىڭ II توپتاعى مۇگەدەك ەكەنىن، پسيحونيەۆرولوگيالىق ديسپانسەردە ەسەپتە تۇرا وتىرىپ، 2025 جىلعى 11 اقپاندا تۇرعىن ءۇي كەشەنىنىڭ ليفتىندە بولعان كەزدە كامەلەتكە تولماعان ادامعا ياعني ە.ء-نىڭ دەنەسىنە زاقىم كەلتىرىپ، ونىڭ بەتىنە پىشاقپەن جاراقات سالعانىن انىقتادى.
سوت پسيحولوگيالىق-پسيحياتريالىق ساراپتامانىڭ قورىتىندىسىنا سايكەس ك. سوزىلمالى پسيحيكالىق اۋرۋدىڭ سالدارىنان، ارەكەت كەزەڭىندە ءوزىنىڭ ءىس-قيمىلىنىڭ ناقتى سيپاتى مەن الەۋمەتتىك قاۋىپتىلىگىن تۇسىنبەگەن جانە ولاردى باسقارا الماعان، پسيحيكالىق جاعدايى بويىنشا وزىنە جانە قوعامعا ءقاۋىپ توندىرگەن. ماجبۇرلەپ ەمدەۋدى قاجەت ەتەدى.
قىلمىستىق كودەكستىڭ 16-بابىنىڭ تالاپتارىنا سايكەس، قوعامعا ءقاۋىپتى ىس-ارەكەت جاساعان ۋاقىتتا ەسى دۇرىس ەمەس كۇيدە بولعان ادام قىلمىستىق جاۋاپتىلىققا تارتىلمايدى. ەسى دۇرىس ەمەس دەپ تانىلعان ادامعا سوت مەديسينالىق سيپاتتاعى ماجبۇرلەۋ شارالارىن قولدانا الادى.
سوت قاۋلىسىنا سايكەس، ك.-گە تالعار اۋدانى اقتاس اۋىلىنداعى قارقىندى باقىلاناتىن مامانداندىرىلعان ۇلگىدەگى مەكەمەدە ستاسيونارلىق ماجبۇرلەپ ەمدەۋ تاعايىندالدى. قاۋلى زاڭدى كۇشىنە ەنگەن جوق.
ەسكە سالايىق، 11 اقپاندا قازاقستان جۇرتشىلىعىن ءدۇر سىلكىندىرگەن وقيعا بولدى. 14 جاستاعى ءجاسوسپىرىم استاناداعى تۇرعىن ۇيلەردىڭ بىرىندە ليفت ىشىندە بەس جاسار بالاعا پىشاقپەن شابۋىل جاسادى. وقيعانىڭ بەينەجازباسى الەۋمەتتىك جەلىلەردە تاراپ، كوپشىلىكتىڭ قىزۋ تالقىسىنا ءتۇستى.
