Astanada ózinen kishi balaǵa liftte pyshaq ala júgirip, betin tilgen balaǵa qatysty tyń derekter belgili boldy, dep habarlaidy Dalanews.kz.
Sot málimetinshe, Astana qalasynyń kámeletke tolmaǵandardyń isteri jónindegi mamandandyrylǵan aýdanaralyq sotyna 14 jastaǵy K.- ge qatysty meditsinalyq sipattaǵy májbúrleý sharalaryn qoldaný týraly qaýlysy bar qylmystyq is túsken.
Sot K.-nyń II toptaǵy múgedek ekenin, psihonevrologiialyq dispanserde esepte tura otyryp, 2025 jylǵy 11 aqpanda turǵyn úi kesheniniń liftinde bolǵan kezde kámeletke tolmaǵan adamǵa iaǵni E.-niń denesine zaqym keltirip, onyń betine pyshaqpen jaraqat salǵanyn anyqtady.
Sot psihologiialyq-psihiatriialyq saraptamanyń qorytyndysyna sáikes K. sozylmaly psihikalyq aýrýdyń saldarynan, áreket kezeńinde óziniń is-qimylynyń naqty sipaty men áleýmettik qaýiptiligin túsinbegen jáne olardy basqara almaǵan, psihikalyq jaǵdaiy boiynsha ózine jáne qoǵamǵa qaýip tóndirgen. Májbúrlep emdeýdi qajet etedi.
Qylmystyq kodekstiń 16-babynyń talaptaryna sáikes, qoǵamǵa qaýipti is-áreket jasaǵan ýaqytta esi durys emes kúide bolǵan adam qylmystyq jaýaptylyqqa tartylmaidy. Esi durys emes dep tanylǵan adamǵa sot meditsinalyq sipattaǵy májbúrleý sharalaryn qoldana alady.
Sot qaýlysyna sáikes, K.-ge Talǵar aýdany Aqtas aýylyndaǵy qarqyndy baqylanatyn mamandandyrylǵan úlgidegi mekemede statsionarlyq májbúrlep emdeý taǵaiyndaldy. Qaýly zańdy kúshine engen joq.
Eske salaiyq, 11 aqpanda Qazaqstan jurtshylyǵyn dúr silkindirgen oqiǵa boldy. 14 jastaǵy jasóspirim Astanadaǵy turǵyn úilerdiń birinde lift ishinde bes jasar balaǵa pyshaqpen shabýyl jasady. Oqiǵanyń beinejazbasy áleýmettik jelilerde tarap, kópshiliktiń qyzý talqysyna tústi.
