استانادا 21 جاستاعى جىگىت نەمەرە اعاسىن ازاپتاپ ءولتىرىپ، تاعى ءۇش جاقىنىن پىشاقتاپ، اۋىر جاراقات سالدى. قالالىق دەنساۋلىق ساقتاۋ باسقارماسى زارداپ شەككەندەردىڭ قازىرگى جاعدايى تۋرالى ايتتى، دەپ حابارلايدى Dalanews.kz.
زارداپ شەككەندەر №1 كوپبەيىندى قالالىق اۋرۋحانادا جاتىر.
“1964 جىلعى ايەلدىڭ كوپتەگەن تىلىنگەن-كەسىلگەن جاراقاتى بار، سول جاق قابىرعاسى سىنعان. اۋرۋحاناعا اۋىر حالدە ءتۇستى، بىردەن وتا جاسالدى. ءقازىر ينتەنسيۆتى تەراپيا پالاتاسىندا جاتىر. 1974 جىلعى ايەلدىڭ دە كوپتەگەن تىلىنگەن-كەسىلگەن جاراقاتى بار، باس جاراقاتى، وڭ جاق قابىرعاسى سىنعان. جالپى جاعدايى ورتاشا، تۇراقتى. ال 18 جاستاعى قىز دا حيرۋرگيا بولىمشەسىنە جاتقىزىلدى. جاعدايى تۇراقتى، ورتاشا”، - دەدى باسقارمانىڭ باسپا ءسوز قىزمەتى ازاتتىق رۋحى پورتالىنا.
ەسكە سالايىق، استانادا ءتۇن جارىمىندا ورىن العان قايعىلى وقيعا ەلوردا تۇرعىندارىن ءدۇر سىلكىندىرگەن ەدى.
الدىن الا مالىمەت بويىنشا، جانجالعا كومپيۋتەرلىك ويىن سەبەپ بولعان.
قايعىلى جاعداي ەلورداداعى مۇستافين كوشەسىندەگى پاتەردە ورىن العان. ۇيدە ءاپالى-سىڭىلى ايەلدەر بىرگە تۇرعان. ەكەۋىنىڭ بالالارى جانە اعالارىنىڭ 21 جاسار ۇلى جانعالي جۇماتايەۆ تا سول ءۇيدى پانالاعان.
جانعالي ەش جەردە جۇمىس ىستەمەگەن، كۇنۇزاققا سمارتفونعا تەلمىرىپ، اتىشۋلى Standoff 2 دەگەن ويىندى ويناۋمەن ۋاقىت وتكىزگەن. بۇل ويىن شىنايى ۇرىس الاڭىنا ۇقساس، نەگىزىنەن جاۋدىڭ كوزىن جويۋ، گراناتا لاقتىرۋ، پىشاقپەن شابۋىل جاساۋ سەكىلدى قانتوگىسكە تولى، قاتىگەز ارەكەتتەردى بەينەلەيدى.
تەرگەۋشىلەردىڭ بولجامىنا ساي، قاندى وقيعا ورىن العان تۇندە جانعالي تاس قاراڭعىدا، ءتۇن ورتاسىنا دەيىن سمارتفونمەن اتىس-شابىس ويىنىن ويناپ وتىرعان.
شامامەن، ساعات ءتىلى تۇنگى ۇشتەردەن اۋعاندا، تاتەسى ودان "تەلەفونىڭدى ءوشىرىپ، ۇيىقتاساڭشى" دەپ ءوتىنىش جاسايدى. ۇي-ىشىندەگىلەردى سمارتفوننىڭ جارىعى مەن دىبىسى مازالاپ، تىنىعۋعا مۇمكىندىك بەرمەگەن. الايدا جۇماتايەۆ اپكەسىنىڭ ەسكەرتۋىن ەلەمەي، ويىندى ءارى قاراي دا جالعاستىرا بەرەدى. كەيىن تاتەسى قايتا اينالىپ كەلىپ، تەلەفوندى ءسوندىرۋدى بۇيىرعان كەزدە ارادا ايعاي-شۋ شىققان.
بارلىعى ورنىنا جايعاسىپ، قالىڭ ۇيقىعا كەتكەن ۋاقىتتا جانعالي اسۇيدەن "سۋىق قارۋ" الىپ، وزىنەن جەتى جاس ۇلكەن نەمەرە اعاسىنا (تاتەسىنىڭ ۇلىنا) پىشاق جۇمسايدى. الدىن الا مالىمەت بويىنشا، مارقۇمعا جيىرما جەردەن پىشاق جاراقاتى تيگەن. جەدەل جاردەم وقيعا ورنىنا جەتىپ ۇلگەرگەنشە، 28 جاستاعى ازامات جان تاپسىرعان.
قىلمىسكەر جان داۋسى شىققان جاس بالانىڭ داۋىسىنان شوشىپ ويانىپ، ورە تۇرەگەلگەن ۇيدەگىلەرگە دە پىشاق الا جۇگىرگەن. قاندىقولدىڭ تىرناعىنا ىلىككەن ءۇي يەلەرى، اپكەلى-سىڭلىلى ايەلدەر مەن نەمەرە ءسىڭلىسى باس،كەۋدە جانە ارقا تۇسىنان اۋىر جاراقات العان. قازىرگى تاڭدا ۇشەۋى دە اۋرۋحانادا ەم قابىلداپ جاتىر. دارىگەرلەر ولاردىڭ ومىرىنە ءقاۋىپ توندىرگەن جارالاردىڭ اۋىرلىعىن اتاپ وتۋدە، الايدا بار كۇشتەرىن سالىپ، ەم-دوم جاساپ جاتقاندارىن مالىمدەدى. مارقۇم 28 جاستاعى ازامات جەدەل جاردەم جەتكەنشە قان كوپ جوعالتقان.
كۇدىكتى جانعالي جۇماتايەۆ وقيعا ورنىندا ۇستالىپ، ۋاقىتشا ۇستاۋ يزولياتورىنا قامالدى. تەرگەۋ امالدارى باستالىپ، وعان «ادام ءولتىرۋ» جانە «ادام ولتىرۋگە وقتالۋ» باپتارى بويىنشا ايىپ تاعىلعانى حابارلاندى.
قۇقىق قورعاۋ ورگاندارى مەن پسيحولوگتار ويىنعا شەكتەن تىس بەرىلىپ كەتۋدىڭ، اسىرەسە ءالى بۇعاناسى بەكىپ ۇلگەرمەگەن جاسوسپىرىمدەر مەن جاستارعا ءقاۋىپتى ەكەنىن ءجيى ەسكەرتەدى. قازىرگى تاڭدا تەرگەۋ جالعاسۋدا، ساراپشىلار قاندى شابۋىلعا ناقتى نە تۇرتكى بولعانىن انىقتاپ، ءىستى سوتقا جولدايتىنى كۇتىلىپ وتىر.
