استانا تۇرعىندارى بىرنەشە جىلدان بەرى قالانىڭ پرومىشلەننىي تۇرعىن الابىندا ورنالاسقان سيليكات زاۋىتىنا قارسى كۇرەسىپ كەلەدى. ولاردىڭ ايتۋىنشا، ءوندىرىس وشاعىنىڭ زياندى قالدىقتارى اۋانى لاستاپ، تىنىس الۋ اۋرۋلارىنىڭ كوبەيۋىنە سەبەپ بولىپ وتىر،دەپ حابارلايدى Dalanews.kz Orda.kz-كە سىلتەمە جاساپ.

زاۋىت 2014 جىلى ىسكە قوسىلعان. سودان بەرى ول اۋانى شاڭ مەن گاز ءتارىزدى قالدىقتارمەن لاستاپ كەلگەن. تۇرعىنداردىڭ ايتۋىنشا، ءتۇتىن كەشكى جانە تۇنگى ۋاقىتتا شىعىپ تۇرعان، ال كەيىنگى كەزدەرى كۇندىز دە بايقالىپ جاتىر. وسى ۋاقىت ارالىعىندا 30 مىڭعا جۋىق ادام يىسكە شاعىمدانىپ، استما سەكىلدى اۋرۋلاردىڭ جيىلەگەنىن ايتقان. ءتىپتى، زاۋىتقا جاقىن ماڭدا مەكتەپ پەن پارك تە ورنالاسقان.

2022 جىلى "قاڭتار وقيعاسىنان" كەيىن زاۋىت جۇمىسى ۋاقىتشا توقتاپ، ءوندىرىس ورنىندا سەحتار پلومبالانعان. استانا اكىمدىگى مەن ەكولوگيا مينيسترلىگى سوت ارقىلى "ەكوبەتون" كومپانياسىنىڭ قىزمەتىن ءماجبۇرلى تۇردە توقتاتۋعا قول جەتكىزگەن. كومپانياعا وتەماقى تولەنىپ، باسقا جەر ۇسىنىلعانىمەن، ولار كوشۋدەن باس تارتقان.

الايدا 2024 جىلدىڭ سوڭىنا قاراي تۇرعىندار زاۋىتتان تاعى دا ءتۇتىن شىعىپ جاتقانىن بايقاعان.

2025 جىلى 13 شىلدەدە پرومىشلەننىي تۇرعىندارى جينالىپ، اۋدان اكىمدىگىن اۋلاعا شاقىردى. كەزدەسۋگە پوليسيا قىزمەتكەرلەرى دە كەلدى. سارايشىك اۋدانى اكىمىنىڭ ورىنباسارى قۋانىش ورىنبەكتىڭ ايتۋىنشا، زاۋىت وكىلدەرى جوعارعى سوتتان جەڭىپ شىققان.

"ءبىز ولاردى كوشىرۋدى ۇسىنىپ وتىرمىز. ءبىراق زاۋىت باسشىلىعى كەلىسپەي وتىر. ولار 18 ناۋرىزدا دا، 10 شىلدەدە دە سوت وتىرىسىنا كەلمەدى. 23 شىلدەدە تاعى ءبىر تىڭداۋ وتەدى. بۇل جولى تالاپ-ارىزدى قۇرىلىس باسقارماسى ءتۇسىرىپ وتىر"، – دەدى ورىنبەك.

تۇرعىندار زاۋىت يەلەرىنىڭ زاڭدى بەلدەن باسىپ، ايىپپۇل تولەپ قانا قۇتىلىپ جاتقانىن ايتىپ نارازى.

"100 مىڭ تەڭگە تولەپ، ءارى قاراي جۇمىسىن جالعاستىرىپ جاتىر. بۇل ادىلەتسىزدىك"، – دەدى جينالعانداردىڭ ءبىرى.

ازاماتتار زاۋىتتىڭ تۇرعىن ءۇي ماڭىنان كوشىرىلۋىن تالاپ ەتۋدە.