استاناداعى ءبىرقاتار رەزونانستىق وقيعالاردان كەيىن قالاداعى تۇرعىن ۇيلەردىڭ قاۋىپسىزدىگى قايتا تالقىلانا باستادى، دەپ حابارلايدى Dala News.

ونەركاسىپ جانە قۇرىلىس مينيسترلىگىنىڭ مالىمەتىنشە، ەلوردادا قازىرگى ۋاقىتتا 178 تۇرعىن ءۇي اپاتتى جاعدايدا دەپ تانىلعان. بۇل نەگىزىنەن 1950–1960 جىلدارى سالىنعان عيماراتتار.

ۆيسە-مينيستر قۋاندىق قاجكەنوۆ سوڭعى ۋاقىتتا بولعان بىرنەشە وقيعا – فەلدشەردىڭ ۇستىنە فاسادتىڭ قۇلاۋى، ليفتكە قاتىستى جاعداي جانە اپاتتى ۇيلەر ماسەلەسى بويىنشا تەكسەرىس جۇرگىزىلىپ جاتقانىن ايتتى. ءقازىر عيماراتتارعا تەحنيكالىق ساراپتاما جاسالىپ، ارنايى كوميسسيا وقيعانىڭ ناقتى سەبەپتەرىن انىقتاۋى ءتيىس.

مينيسترلىك وكىلىنىڭ ايتۋىنشا، ەگەر اقاۋلار قۇرىلىس كەزىندەگى قاتەلىكتەردەن تۋىنداعانى دالەلدەنسە، جاۋاپكەرشىلىك قۇرىلىس كومپانياسىنا جۇكتەلەدى. مۇنداي جاعدايدا اكىمشىلىك نەمەسە قىلمىستىق جاۋاپكەرشىلىككە دەيىن قاراستىرىلۋى مۇمكىن. ال ماسەلە ءۇيدى كۇتىپ-ۇستاۋدىڭ ساپاسىزدىعىنان بولسا، وندا باسقارۋشى كومپانيالار نەمەسە وسي جاۋاپ بەرەدى.

سونداي-اق ۆيسە-مينيستر نەگىزگى قۇرىلىس كونسترۋكسيالارىنا كەمىندە 10 جىلدىق كەپىلدىك بەرىلەتىنىن ەسكە سالدى. ەگەر وسى مەرزىم ىشىندە اقاۋ انىقتالسا، ونى قۇرىلىس سالۋشى ءوز ەسەبىنەن جويۋعا مىندەتتى.

جالپى ەل بويىنشا شامامەن 60 مىڭ تۇرعىن ءۇي بار. سونىڭ 1،7%-ى اپاتتى جاعدايداعى عيماراتتار قاتارىنا جاتادى. ەلورداداعى مۇنداي ۇيلەردىڭ ءبىر بولىگى تەحنيكالىق تۇرعىدان كۇشەيتىلسە، ەندى ءبىر بولىگى بۇزىلىپ، ورنىنا جاڭا تۇرعىن ۇيلەر سالۋ جوسپارلانىپ وتىر.