بۇگىن Astana Hub-تا «قازاقتەلەكوم» اق باسقارما ءتوراعاسى باعدات مۋسين مەن Brothers Ventures نەگىزىن قالاۋشى دانييل ليبەرماننىڭ قاتىسۋىمەن اشىق پىكىرتالاس ءوتتى. كەزدەسۋ جاھاندىق تەحنولوگيالىق ترەندتەر، ورتالىق ازيادا ونىمدەردى قۇرىپ، كەڭەيتۋ باسىمدىقتارى، جاساندى ينتەللەكت داۋىرىندەگى جاڭا بيزنەس-مودەلدەر، سونداي-اق الەمدىك AI-ەكونوميكادا ستراتەگيالىق حاب رەتىندەگى قازاقستاننىڭ ءرولى تالقىلاندى، دەپ حابارلايدى Dalanews.kz.
سەسسيا بارىسىندا سپيكەرلەر جاساندى ينتەللەكت تەحنولوگيالارىنىڭ قارقىندى دامۋى مەن ولاردىڭ جاھاندىق نارىققا اسەرىن، قازاقستاننىڭ الەمدىك دەڭگەيدەگى ونىمدەردى جاساۋعا قابىلەتتى ەل رەتىندەگى الەۋەتىن ءسوز ەتتى. قازاقستان بۇگىندە دامىعان سيفرلىق ينفراقۇرىلىمدى، قوعامنىڭ يننوۆاسيالاردى تەز بەيىمدەۋگە دايىندىعىن جانە حالىقارالىق تەحنولوگيالىق كوماندالارعا تارتىمدى بولاتىن ورتاعا اينالۋ ماقساتىن ۇشتاستىرىپ وتىرعانى اتاپ ءوتىلدى. قاتىسۋشىلار ەسەپتەۋ قۋاتىنا قول جەتكىزۋ ماسەلەسىنە باسا نازار اۋداردى.
«ءبىزدى اقىرىنداپ Digital by default حالقى دەپ اتاۋعا بولادى. ادامدار كەز-كەلگەن سيفرلىق يننوۆاسيانى بىردەن ءتۇسىنىپ، جاپپاي قولدانا باستايدى. 2018 جىلى ەلىمىزدە كۇندەلىكتى ساۋدا-ساتتىق كەزىندە تۇرعىنداردىڭ قولما-قول اقشادان گورى، اقشا اۋدارىمدارىن جاساۋعا بەت بۇرعانىن كورگەندە سيفرلىق توڭكەرىس بولعانىن ءتۇسىندىم. بۇل جەتىلگەن سيفرلىق مادەنيەتتىڭ كورسەتكىشى»، - دەپ اتاپ ءوتتى «قازاقتەلەكوم» اق باسقارما ءتوراعاسى باعدات مۋسين.
اعايىندى ليبەرماندار دانيەل مەن ديەۆيد تەحنولوگيالىق كاسىپكەرلەر، ءارى حالىقارالىق دەڭگەيدەگى ينۆەستورلار رەتىندە تانىمال. ولار ويىن، مەديا جانە تەحنولوگيالىق جوبالاردى قۇرۋ ءۇشىن جۇمىس ىستەدى، اقش-تاعى ءىرى كومپانيالارمەن ىنتىماقتاستىقتا بولىپ، Brothers Ventures قورى ارقىلى ستارتاپ ەكوجۇيەسىن بەلسەندى تۇردە دامىتۋدا. ليبەرمانداردىڭ نەگىزگى ماقساتتارىنىڭ ءبىرى – تەحنولوگيانى تەك ءىرى بيزنەس ءۇشىن عانا ەمەس، بارلىعىنا قولجەتىمدى جانە دەموكراتيالىق ەتەتىن قۇرالداردى جاساۋ.
«ءبىز كاليفورنيادا بولعاندا جابىق كەڭىستىكتە وتىرعانداي، الەمدەگى ناقتى احۋالدى جەتە تۇسىنە المايمىز. ەندى مىنە، قازاقستاندا مەملەكەتتىك قىزمەتتەردەن باستاپ بازالىق سيفرلاندىرۋعا دەيىنگى كوپتەگەن پروسەستەر اقش-پەن سالىستىرعاندا الدا تۇرعانىن كورىپ وتىرمىن. Google، NVIDIA جانە Intel سياقتى كومپانيالاردى قوسپاعاندا، ەل كوپتەگەن اسپەكتىلەردە 50 جىل بۇرىن ءومىر سۇرەدى. الەمنىڭ كوپتەگەن ەلدەرى ءقازىردىڭ وزىندە ەسەپتەۋ قۋاتتىلىعىنا ۇلكەن كولەمدە قالاي قول جەتكىزۋگە بولادى دەپ باس قاتىرۋدا. مۇنداي رەسۋرستاردى قامتاماسىز ەتۋ مۇمكىندىگى بار ادام بۇكىل الەم پايدالاناتىن قولدانبالاردى جاساي الادى»، - دەپ اتاپ ءوتتى Brothers Ventures نەگىزىن قالاۋشى دانييل ليبەرمان.
دانييل ليبەرمان قازاقستانعا ساپارى اياسىندا Astana Hub جانە Alem.AI حالىقارالىق جاساندى ينتەللەكت ورتالىعىنا باس سۇقتى، جاساندى ينتەللەكت جانە سيفرلىق دامۋ مينيسترلىگىنىڭ باسشىلىعىمەن كەزدەستى، سونداي-اق «قازاقتەلەكوم» اق جانە «سامۇرىق-قازىنا» قورىنىڭ كوماندالارىمەن تەحنيكالىق سەسسيالار وتكىزدى.
