استانادا اۆتوبۋس قاعىپ كەتكەن 12 جاستاعى الۋا بەكەننىڭ وتباسىنا 19 ميلليون 660 مىڭ تەڭگە كولەمىندە ساقتاندىرۋ وتەماقىسى تولەندى. بۇل تۋرالى «ەۆرازيا» ساقتاندىرۋ كومپانياسى حابارلادى. وتەماقى جولاۋشىلار الدىنداعى تاسىمالداۋشىنىڭ مىندەتتى ساقتاندىرۋى اياسىندا بەرىلگەن، دەپ حابارلايدى Dalanews.kz.

ساقتاندىرۋ كومپانياسىنىڭ مالىمدەۋىنشە، الۋا ۇزاق مەرزىمدى ەم مەن وڭالتۋدى قاجەت ەتەدى، ءارى كەيىن پروتەز سالۋ جوسپارلانىپ وتىر. وسىنى ەسكەرە وتىرىپ، قوسىمشا قۇجاتتار – ونىڭ ىشىندە مۇگەدەكتىك تۋرالى انىقتاما – تولىق جينالماعانىنا قاراماستان، كومپانيا وتەماقىنى تولىق كولەمدە تولەۋ تۋرالى شەشىم قابىلداعان.

«ەۆرازيا» سك زاڭ بويىنشا جول-كولىك وقيعاسى سالدارىنان بالا مۇگەدەك بولعان جاعدايدا 5 000 اەك مولشەرىندە، ياعني 19،66 ملن تەڭگە وتەماقى قاراستىرىلعان دەپ ءتۇسىندىردى. 

قازىرگى قولدانىستاعى زاڭناماعا سايكەس، مۇگەدەكتىك انىقتاماسىن الۋ ءۇشىن ازاماتتار مەديكو-الەۋمەتتىك ساراپتامادان (ءماس) ءوتۋى كەرەك. بۇل پروسەسس ءبىراز ۋاقىت الادى. سول سەبەپتى بارلىق قاجەتتى قۇجاتتار ءتۇسىپ وتىرعان تارتىپپەن ساقتاندىرۋ ىسىنە تىركەلەتىن بولادى.

كومپانيا وكىلدەرى حابارلاعانداي، جول اپاتىنان كەيىن «ەۆرازيا» سك ارنايى جەدەل جەلى ۇيىمداستىرىپ، وعان اپات كەزىندە زارداپ شەككەن جولاۋشىلار نەمەسە ولاردىڭ زاڭدى وكىلدەرى حابارلاسقان. بارلىق سۇراقتار بويىنشا كەڭەستەر بەرىلىپ، قولدانىستاعى زاڭناماعا سايكەس وتەماقى الۋ ءتارتىبى تۇسىندىرىلگەن.