استانا قالاسىنىڭ اكىمى جەڭىس قاسىمبەك پاراليمپيادا ويىندارىندا ەل قورجىنىنا مەدال سالعان سپورتشىلارمەن كەزدەسىپ، ولاردى قۇتتىقتادى، – دەپ حابارلايدى Dalanews.kz استانا قالاسى اكىمىنىڭ باسپا ءسوز قىزمەتىنە سىلتەمە جاساپ.
پاراليمپيادا ويىندارىنىڭ جۇلدەگەرلەرىمەن كەزدەسكەن جەڭىس قاسىمبەك ولاردىڭ الەمدىك سپورت دوداسىندا ەلىمىزدىڭ ابىرويىن اسقاقتاتقانىن العا تارتىت. سولاردىڭ ءبىرى ءھام بىرەگەيى اقمارال ناۋاتبەك. ول ەلىمىزگە كوپتەن كۇتكەن جەڭىس سىيلاعان سپورتشى.
– اقمارال پارا دزيۋدودان الەم چەمپيونى اتانىپ، پاراليمپيادا التىنىن جەڭىپ العان العاشقى قازاقستاندىق سپورتشى رەتىندە ەل تاريحىنا ەندى. سايىس كەزىندە ەلوردا تۇرعىندا اقمارالعا جانكۇيەر بولعانى انىق. ەل سەنىمىن اقتاعان سپورتشىمىزدى تۇعىرلى جەڭىسىمەن شىن جۇرەكتەن قۇتتىقتايمىن! – دەدى استانا قالاسى اكىمى جەڭىس قاسىمبەك.
الەم الدىندا كوك تۋىمىزدى جەلبىرەتكەن تاعى ءبىر ەلوردالىق سپورتشى – ەرعالي شامەي. پاراليمپيادا ەرعالي كۇمىس مەدال جەڭىپ الدى. ەلوردالىق سپورتشىلاردىڭ جەڭىسىنىڭ ارتىندا توقتاۋسىز جاتتىعۋلار، تەمىردەي ءتارتىپ، شىدامدىلىق، جاقىندارىنىڭ، باپكەرلەرىنىڭ قولداۋى، وزىنە دەگەن سەنىم جاتقانى انىق.
ءوز كەزەگىندە قالا باسشىسى اقمارال ناۋاتبەككە 3 بولمەلى پاتەردىڭ سەرتيفيكاتى مەن 30 ملن تەڭگە اقشالاي سىياقى، ال ونىڭ جاتتىقتىرۋشىسى ايدىن اناپينگە 10 ملن تەڭگە تابىس ەتتى. ال ەرعالي شامەيگە 2 بولمەلى پاتەردىڭ سەرتيفيكاتى مەن 25 ملن تەڭگە اقشالاي سىياقىسى تابىستالدى. ال ونىڭ جاتتىقتىرۋشىسى داۋرەن ورازوۆ مىرزاعا 7 ملن تەڭگە تابىس ەتىلدى. وسى رەتتە اقشالاي سىياقى دەمەۋشىلەر تاراپىنان بەرىلگەنىن ايتا كەتۋىمىز كەرەك.
كەزدەسۋ بارىسىندا استانا قالاسى اكىمى سپورتشىلارعا قولداۋ-كومەكتەرىن كورسەتە بەرەتىندەرىن جەتكىزدى.
– ءبىز ءوز تاراپىمىزدان سپورتشىلارىمىزعا قولداۋ كورسەتۋدى ارى قاراي دا جالعاستىرامىز. سول سياقتى قالانىڭ سپورتتىق ينفراقۇرىلىمىن جاقسارتىپ، بۇقارالىق سپورتپەن شۇعىلدانۋ ءۇشىن، ونىڭ ىشىندە بالالار مەن جاسوسپىرىمدەرگە ارنالعان سپورت مەكتەپتەرىنە ءتيىستى جاعداي جاسايمىز، – دەدى جەڭىس قاسىمبەك.
