استانادا جولاۋشىلاردىڭ ەسكەرتۋىنە قۇلاق اسپاي، جىلدامدىقتى شەكتەن تىس ارتتىرىپ، ودان سوڭ اياعىن تەرەزەدەن شىعارىپ «ەركەلىككە» سالىنعان اۆتوبۋس جۇرگىزۋشىسىنىڭ ارەكەتى اكىم قۇلاعىنا دا جەتكەن.

بۇل تۋرالى استانا اكىمى اسەت يسەكەشيەۆ ءوزىنىڭ فەيسبۋكتاعى پاراقشاسىندا جاريالادى. ەسكە سالا كەتسەك، كەشە جەلى قولدانۋشىسى ءوز پاراقشاسىندا نارازىلىق جازباسىن جاريالاعانىن جازعان ەدىك. وندا اۆتوبۋس جۇرگىزۋشىسىنىڭ تەرەزەدەن اياعىن شىعارىپ، قوعامدىق كولىكتى ەرەجەگە باعىنباي باسقارعانى جازىلعان.

– بۇگىن «استانا قالالىق ترانسپورتتىق باقىلاۋ قىزمەتىنە» جولاۋشىلار تاسىمالدايتىن Z 062 DC مەملەكەتتىك ءنومىرلى 4ء-شى مارشرۋتتاعى اۆتوبۋس جۇرگىزۋشىسىنە بايلانىستى شاعىپ كەلىپ ءتۇستى. اتالعان دەرەك بويىنشا 24 شىلدە كۇنى اۆتوبۋس جۇرگىزۋشىسى جۇبانىش جۇمابەكوۆ تبق-عا ءىستىڭ اق-قاراسىن انىقتاۋ ءۇشىن شاقىرىلدى، – دەپ جازعان اكىم.

ال جۇرگىزۋشى ءوز تۇسىنىكتەمەسىندە جولاۋشىلار تاسىمالى كەزىندە جول قوزعالىسى ەرەجەسىن بۇزعانىن تولىعىمەن مويىنداپتى.

«№2 اۆتوبۋس پاركى» ج ش س بۇيرىعىمەن 25 شىلدەدەن باستاپ جۇرگىزۋشى جۇبانىش جۇمابەكوۆ ەڭبەك ءتارتىبىن بۇزعانى ءۇشىن جاۋاپكەرشىلىككە تارتىلىپ، ق ر ەڭبەك كودەكسى 64 بابى 3 تارماعى نەگىزىندە قاتاڭ تۇردەگى سوگىس جاريالانىپ، 25 شىلدە – 1 تامىز ارالىعىندا استانا قالالىق ترانسپورت ماماندارىنىڭ ءبىلىمىن جەتىلدىرۋ ورتالىعىنا قوسىمشا وقۋ جۇمىستارىنا جىبەرىلدى. ول وقۋ اياقتالعان سوڭ تاپسىرىلعان ەمتيحان ناتيجەسى مەن پسيحولوگيالىق تەست قورىتىندىسى بويىنشا ونىڭ اۆتوبۋس پاركىندەگى جۇمىسىن جالعاستىرۋ ماسەلەسى شەشىلەدى»، – دەدى يسەكەشيەۆ.

 

دەرەككوزى: Stan.kz