بۇگىن ق ر پرەزيدەنتى اكىمشىلىگى قحا حاتشىلىعى مەڭگەرۋشىسىنىڭ ورىنباسارى عالىمجان ماحان جانە ق ر مادەنيەت جانە اقپارات مينيسترلىگى ەتنوسارالىق قاتىناستاردى دامىتۋ كوميتەتىنىڭ ءتوراعاسى عالىم شويكين جۇمىس ساپارىمەن تۇركىستان وبلىسىنا كەلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ساپار اياسىندا ەلوردادان كەلگەن قوناقتار تۇركىستان قالاسىنداعى «ۇلى دالا ەلى» ورتالىعىندا «ەتنوسارالىق قارىم-قاتىناس مادەنيەتىن قالىپتاستىرۋدىڭ پسيحولوگيالىق-پەداگوگيكالىق نەگىزدەرى» تاقىرىبىنداعى سەميناردا ءسوز سويلەپ، پىكىر الماستى. اتالعان جيىنعا اۋدان، قالالارداعى ءبىلىم بولىمدەرىنىڭ تاربيە ءىسى جونىندەگى ادىسكەرلەرى، اۋدان، قالالارداعى ەتنوس وكىلدەرى تىعىز شوعىرلانعان ەلدىمەكەندەردەگى جالپى جانە ورتا ارناۋلى وقۋ ورىندارى ديرەكتورلارى مەن ولاردىڭ تاربيە ءىسى جونىندەگى ورىنباسارلارى، اۋدان، قالالارداعى ەتنوس وكىلدەرى تىعىز شوعىرلانعان ەلدىمەكەندەردەگى جالپى جانە ورتا ارناۋلى وقۋ ورىندارىنىڭ وقىتۋشىلارى مەن پسيحولوگتارى، «قوعامدىق كەلىسىم» كمم-نىڭ اۋداندىق، قالالىق فيليالدارىنىڭ باسشىلارى قاتىستى.
– ءقازىر ەلىمىزدەگى ەتنوستاردى ۇيىستىرىپ وتىرعان اسسامبلەيا وتانشىلدىقتى دارىپتەيتىن ينستيتۋت رەتىندە دامىپ كەلەدى. بىلتىر اقساقالدار كەڭەسى مەن ەتنومەدياسيا ينستيتۋتى قۇرىلدى. بۇل باعىتتاعى جۇمىستارعا پرەزيدەنتىمىزدىڭ ءوزى وڭ باعا بەرىپ، ودان ءارى جانداندىرۋدى تاپسىردى. ءقازىر تۇركىستان، جامبىل وبلىستارىندا ەتنوسارالىق الاۋىزدىقتىڭ الدىن الۋ جۇمىستارى ءتيىمدى ءجۇرىپ جاتىر. اسسامبلەيانىڭ باستى ميسسياسى بارلىق ەتنوستاردى قازاق حالقىنىڭ قاسىنا ۇيىستىرىپ، ءبىر شاڭىراق استىنا جيناۋ. قازاقستان حالقى اسسامبلەياسىنىڭ XXXIII سەسسياسىندا پرەزيدەنت قاسىم-جومارت توقايەۆ قوعامعا ىرىتكى سالاتىن ءاربىر ارەكەتكە توسقاۋىل قويىلۋى كەرەكتىگىن قاداپ ايتتى.
قازاقستان – بەيبىتشىلىكتى تۋ ەتكەن، 100-دەن استام ەتنوس وكىلىن باۋىرىنا باسقان كيەلى مەكەن. ءبىز دەموكراتياعا دەن قويعان قۇقىقتىق ەلمىز. بۇل رەتتە ەلىمىز 100-دەن اسا حالىقارالىق كونۆەنسياعا، كەلىسىمگە، دەكلاراسياعا قول قويعان. ياعني، قوعامدا ۇلتىنا قاراي ەرەكشەلەنۋگە، وقشاۋلانۋعا ۇمتىلعان كەز كەلگەن ارەكەتكە، اسىرەسە، ازاماتتاردى تىلىنە، ۇلتىنا، دىنىنە نەمەسە مادەنيەتىنە بولا ارانداتۋعا، يا بولماسا كەمسىتۋگە مۇلدە جول بەرمەيتىن ورتا قالىپتاستىرۋ ماڭىزدى. بۇل ورايدا، بۇگىنگى سەميناردىڭ ءبارىمىز ءۇشىن ماڭىزى جوعارى دەپ ەسەپتەيمىن. تولەرانتتىلىق قاعيداسىن ۇستانىپ، ءبىرتۇتاستىققا سىنا قاعۋشىلارعا يممۋنيتەت قالىپتاستىرۋىمىز كەرەك. ارينە بۇل تۇستا اسسامبلەياعا ارتىلار جۇك اۋىر. سوندىقتان بۇل ينستيتۋتتى جان-جاقتى جاڭعىرتۋ جۇمىستارى جالعاسا بەرمەك، – دەدى ەتنوسارالىق قاتىناستاردى دامىتۋ كوميتەتىنىڭ ءتوراعاسى عالىم شويكين.
جيىندا قوعامدىق كەلىسىمدى نىعايتۋ جۇمىستارىن باق-تا جانداندىرۋ، جالعان اقپاراتتىڭ تارالۋىنا قارسى زاڭ اياسىندا ءاقپاراتتىق-تۇسىندىرۋ جۇمىستارىن كۇشەيتۋ جانە وزەكتى ماسەلەلەردى، ۇسىنىستاردى تالقىلاۋ، اقپاراتتىق جۇمىستاردى جەتىلدىرۋ جايى تالقىلاندى. بۇل رەتتە، «پاراسات» مەدياسيا جانە قۇقىق ورتالىعىنىڭ ساراپشى-كونفليكتولوگى سالامات جۇماعۇلوۆ، قولدانبالى ەتنوساياسي زەرتتەۋلەر ينستيتۋتى قولدانبالى زەرتتەۋلەر ورتالىعىنىڭ ديرەكتورى عالي دىنمۇحاممەد ءوز تاجىريبەلەرىمەن ءبولىسىپ، مازمۇندى بايانداما جاسادى.
جيىنعا قاتىسۋشىلار سەميناردا پىكىر الماسىپ، ۇسىنىس-پىكىرلەرىن ورتاعا سالدى.
ەسكە سالا كەتسەك، ەلوردادان كەلگەن توپتىڭ تۇركىستان وبلىسىنداعى ساپارى ەرتەڭ دە جالعاسادى. ساپار شەڭبەرىندە سارىاعاش جانە كەلەس اۋداندارىندا اسسامبلەيا مۇشەلەرىمەن، ەتنومادەني بىرلەستىكتەر مەن اۋدان تۇرعىندارىمەن بىرنەشە كەزدەسۋ وتەدى دەپ جوسپارلانعان.
