ق ر پرەمەر-مينيسترىنىڭ ءبىرىنشى ورىنباسارى اسقار مامين تۇركىستان وبلىسىنىڭ ورتالىعى تۇركىستان قالاسىنا جۇمىس ساپارىمەن كەلدى.

ساپارى بارىسىندا تۇركىستان ايماعىن دامىتۋ پەرسپەكتيۆالارى تۋرالى كوميسسيانىڭ ءبىرىنشى وتىرىسىنا قاتىسىپ، قالانىڭ دامۋ جوسپارىمەن تانىستى.

جاڭا وبلىس ورتالىعىنىڭ دامۋ جوسپارىمەن تانىستىرعان ج.تۇيمەبايەۆ ەلباسى تاپسىرماسىن ورىنداۋ ماقساتىندا ارنايى شتاب قۇرىلعانىن اتاپ ءوتتى.

اسقار مامينگە سونىمەن قاتار، جاڭا اكىمشىلىك-ىسكەرلىك ورتالىقتى دامىتۋ جوباسى، جول، قۇرىلىس ينفراقۇرىلىمدارىن ودان ءارى جاڭعىرتۋ جۇمىستارى باياندالدى.

ماسەلەن، جاڭادان جاسالعان باس جوسپارعا سايكەس قالا اۋماعىنىڭ كولەمى 35 مىڭ گەكتارعا ۇلعايعان. ال تۇركىستان قالاسىنىڭ شىعىس بولىگىنەن جاڭا قالاشىق سالۋ ءۇشىن 670 گەكتار جەر ءبولىنىپ وتىر. ونىڭ 170 گەكتار بولاتىن اۋماعىنا اكىمشىلىك-ىسكەرلىك ورتالىق سالىنسا، 300 گەكتارىنا كوپ قاباتتى تۇرعىن ۇيلەر تۇرعىزىلاتىن بولادى. اتالعان قالاشىقتا 65 مىڭعا جۋىق تۇرعىن تۇرادى دەپ جوسپارلانۋدا.سونىمەن قاتار، جاڭا جوسپارعا سايكەس ينفراقۇرىلىمدىق جۇيەلەردى جانە كولىكتىك-لوگيستيكالىق باعىتتى دامىتۋ جولدارى قاراستىرىلۋدا.



بۇدان بولەك، تانىستىرىلىم بارىسىندا  «كونە تۇركىستان» تاريحي بولىگىن جاڭعىرتۋ جوباسى تۋرالى باياندالدى. جوبا ق.ا.ياسساۋي كەسەنەسى ماڭىنداعى قورعانداردى رەكونسترۋكسيالاۋعا باعىتتالعان. كونە تۇركىستان» جوباسىنىڭ نەگىزگى يدەيالىق ءمانىن ىسكە اسىرۋدىڭ 2 نۇسقاسى ۇسىنىلىپ وتىر. ونىڭ ءبىرىنشىسى «تۇركسوي» ۇيىمىنا مۇشە ەلدەردىڭ مادەني وشاقتارىن ناقتى تاريحي سيپاتتا، وزىندىك ساۋلەتتىك ناقىشتا قالىپتاستىرۋ جونىندە جوبالىق ۇسىنىستارىن الۋ جانە سول ەلدەرگە ءتيىستى نىسانداردى سالدىرۋ. ەكىنشى نۇسقادا تۇركىتىلدەس ەلدەر تاراپىنان ينۆەستيسيا سالۋ ماسەلەسىمەن قاتار وتاندىق نەمەسە باسقا دا ينۆەستورلاردى تارتۋ جۇمىستارى قوسا جۇرگىزۋ قارالعان.

قالانىڭ دامۋ جوسپارىمەن تانىسقان  اسقار مامين اتالعان جۇمىستاردىڭ ورىندالۋى ۇكىمەت تاراپىنان قاداعالاناتىنىن ايتىپ، مەملەكەت باسشىسى تاپسىرماسىنىڭ ءتيىستى دەڭگەيدە جۇزەگە اسىرۋ ءۇشىن ۇكىمەتتەن مەيلىنشە قولداۋ كورسەتىلەتىنىن جەتكىزدى.

ساپارى بارىسىندا ق ر پرەمەر-مينيسترىنىڭ ءبىرىنشى ورىنباسارى اسقار مامين تۇركىستان قالاسى اكىمدىگىنىڭ جۇمىسىمەن جانە مەملەكەتتىك قىزمەتكەرلەرگە ارنالعان جاتاحانامەن، سونداي-اق، قولدانىستاعى تەمىر جول ۆوكزالىن ارالاپ كوردى.

تۇركىستان وبلىسى اكىمىنىڭ باسپا ءسوز قىزمەتى