كەشە كەشكىسىن ماسكەۋدە قىرعىزستاننىڭ تۇڭعىش پرەزيدەنتى، كوتەرىلىس كەزىندە وتباسىن الىپ ەلدەن قاشقان اسقار اقايەۆتىڭ ۇلى ايدار اقايەۆ كەنەتتەن دۇنيە سالدى.

44 جاستاعى ايدار اقايەۆتىڭ جۇرەگى توقتاپ قالدى. دارىگەرلەر ونى قۇتقارا الماعان.

ەسكە سالساق، 2005 جىلدىڭ 24 ناۋرىزىندا تاقتان تايدىرىلعان پرەزيدەنتتىڭ ءتورت بالاسى بار – بەرمەت، ايدار، ساادات جانە يليم.

بەرمەت پەن ايدار اقايەۆتار بيلىكتىڭ «العا قىرعىزستان» پارتياسىنان دەپۋتاتتىق ماندات الىپ، جوگوركۋ كەنەش دەپۋتاتى بولعاندا ەلدە نارازىلىق تۋىنداعان. ميتينگ ناتيجەسىندە نارازى حالىق 2005 جىلدىڭ 24 ناۋرىزىندا «اق ءۇيدى» باسىپ الىپ، اسقار اقايەۆ وتباسىن الىپ ەلدەن قاشتى.

1998 جىلى ايدار اقايەۆ قازاقستان پرەزيدەنتى نۇرسۇلتان نازاربايەۆتىڭ 18 جاستاعى قىزى ءاليا نازاربايەۆاعا ۇيلەنگەن. 2001 جىلى ەكەۋى اجىراسىپ كەتتى.

2002 جىلى ايدار 21 جاستاعى تەلەجۇرگىزۋشى سايكال چوكۋبايەۆاعا ۇيلەندى. ەكەۋىنىڭ ءۇش بالاسى بار.

وتباسى ماسكەۋگە قاشقاننان كەيىن ايدار بيزنەسپەن اينالىسقان.

ايدار اقايەۆ كەزىندە ەلدەگى ەڭ ءىرى GSM-وپەراتورى بيتەلدىڭ قوجايىنى بولعان. سونداي-اق «رەنتون-گرۋپپ» اكسيالارىنىڭ پاكەتىنە يەلىك ەتكەن.

2005 جىلدىڭ ناۋرىزىندا بارلىق مەملەكەتتىك لاۋازىمدارى مەن دەپۋتاتتىق وكىلەتتىكتەرىنەن ايىرىلدى. باس پروكۋراتۋرا ونىڭ ۇستىنەن مەملەكەت قارجىسىن جىمقىرۋ، كۇش كورسەتۋ ارقىلى بوتەننىڭ مۇلكىن يەلەنۋ، قارجىلىق الاياقتىق فاكتىلەرى بويىنشا قىلمىستىق ءىس قوزعاعان.