Asqar Aqaevtyń uly qaitys boldy
44 jastaǵy Aidar Aqaevtyń júregi toqtap qaldy. Dárigerler ony qutqara almaǵan.
Eske salsaq, 2005 jyldyń 24 naýryzynda taqtan taidyrylǵan prezidenttiń tórt balasy bar – Bermet, Aidar, Saadat jáne Ilim.
Bermet pen Aidar Aqaevtar biliktiń «Alǵa Qyrǵyzstan» partiiasynan depýtattyq mandat alyp, Jogorký Kenesh depýtaty bolǵanda elde narazylyq týyndaǵan. Miting nátijesinde narazy halyq 2005 jyldyń 24 naýryzynda «Aq úidi» basyp alyp, Asqar Aqaev otbasyn alyp elden qashty.
1998 jyly Aidar Aqaev Qazaqstan prezidenti Nursultan Nazarbaevtyń 18 jastaǵy qyzy Áliia Nazarbaevaǵa úilengen. 2001 jyly ekeýi ajyrasyp ketti.
2002 jyly Aidar 21 jastaǵy telejúrgizýshi Saikal Chokýbaevaǵa úilendi. Ekeýiniń úsh balasy bar.
Otbasy Máskeýge qashqannan keiin Aidar biznespen ainalysqan.
Aidar Aqaev kezinde eldegi eń iri GSM-operatory Biteldiń qojaiyny bolǵan. Sondai-aq «Renton-grýpp» aktsiialarynyń paketine ielik etken.
2005 jyldyń naýryzynda barlyq memlekettik laýazymdary men depýtattyq ókilettikterinen aiyryldy. Bas prokýratýra onyń ústinen memleket qarjysyn jymqyrý, kúsh kórsetý arqyly bótenniń múlkin ielený, qarjylyq alaiaqtyq faktileri boiynsha qylmystyq is qozǵaǵan.
