جامبىل وبلىسىنداعى اسكەري بولىمدەردىڭ بىرىندە قاراۋىل باستىعى وق جاراقاتىنان قازا تاپتى، دەپ حابارلايدى Dala News.
الەۋمەتتىك جەلىلەردەگى مالىمەتكە سايكەس، 15 ناۋرىز كۇنى قاراۋىلدىڭ ءۇشىنشى بەكەتىندە ۆەدومستۆولىق كۇزەت قىزمەتكەرى كارابيننەن ابايسىزدا وق اتىپ، قاراۋىل باستىعىنا تيگەن.
وقيعا سالدارىنان جارالانعان ەر ادام اۋرۋحاناعا جەتكىزىلگەنىمەن، دارىگەرلەر ونىڭ ءومىرىن ساقتاپ قالا المادى.
ىشكى ىستەر مينيسترلىگىنىڭ اسكەري-تەرگەۋ دەپارتامەنتى اتالعان فاكتىنى راستاپ، قازا تاپقان ادامنىڭ اسكەريلەندىرىلگەن كۇزەت قىزمەتىنىڭ ازاماتتىق قىزمەتكەرى بولعانىن حابارلادى.
«قازىرگى ۋاقىتتا سوتقا دەيىنگى تەرگەۋ جۇرگىزىلۋدە. وقيعانىڭ بارلىق ءمان-جايى قاجەتتى تەرگەۋ ارەكەتتەرى مەن پروسەسسۋالدىق شارالار ناتيجەسىندە انىقتالادى»، – دەپ مالىمدەدى ءىىم.
