قارجى كەپىلدە تۇرعان عيماراتتى ساتىپ الۋعا، قۇجاتتامالاردى رەتتەۋگە باعىتتالىپتى. ەندىگى كەزەكتە قۇنى 3 ملن اقش دوللارى بولاتىن قۇرال-جابدىقتار ساتىپ الىنىپ، كەن ءوندىرۋ كاسىپورنى ءوز جۇمىسىن باستاماق. اتالعان كاسىپورىن ىسكە قوسىلعان ۋاقىتتا 200-گە جۋىق ادام جۇمىسپەن قامتىلادى دەپ جوسپارلانۋدا. بۇل تۋرالى كەنتاۋ قالاسىنىڭ اكىمى ءابدىباقىت ماقۇلبايەۆ اۋىل تۇرعىندارى الدىنداعى ەسەپتىك كەزدەسۋىندە ايتتى، - دەپ حابارلايدى قالا اكىمىنىڭ باسپا ءسوز قىزمەتى.
بۇگىندە جوبالاۋ سمەتالىق قۇجاتتامالارى ازىرلەنىپ جاتقانىن ايتقان «اششىساي تاۋ-كەن كومبيناتى» ج ش س ديرەكتورى نىسانباي كەنجەبايەۆ اقپان، ناۋرىز ايىندا زاۋىتتى قايتا تىركەۋ جانە زاڭداستىرۋ جۇمىستارى جۇرگىزىلەتىنىن جەتكىزدى.
– تابيعاتتى قورعاۋ جايىن ستاندارتتارعا سايكەستەندىرەمىز. بۇل جۇمىستاردىڭ بارلىعىن اتقارۋ ءۇشىن ۋاقىت كەرەك. 25 جىلعا قابىلدانىپ وتىرعان باعدارلاما بويىنشا جوبا جەر قويناۋىنداعى قازبا بايلىقتاردى يگەرۋ ماقساتىندا جۇزەگە اسادى. جوبا بويىنشا 200-گە جۋىق ادام جۇمىسپەن قامتىلادى. جىل سوڭىندا كاسىپورىن ءوز جۇمىسىن باستايدى دەپ كۇتىلۋدە، – دەدى نىسانباي كەنجەبايەۆ.
وسى رەتتە قالا باسشىسى جىل سوڭىنا دەيىن جەرگىلىكتى تۇرعىنداردى ارنايى باعدارلامالار بويىنشا وقىتىپ، ماماندىقتارىن سايكەستەندىرۋ جۇمىستارىن جۇزەگە اسىرۋ قاجەتتىگىن اتاپ ءوتتى.
ەسەپتىك كەزدەسۋدە تۇرعىنداردىڭ سۇراقتارىنا كەڭ كولەمدى جاۋاپ بەرگەن ءا.ماقۇلبايەۆ سالا ماماندارىنا اتقارىلۋى ءتيىس ناقتى تاپسىرمالاردى جۇكتەپ، الداعى مىندەتتەردى ناقتىلادى.
وقو اكىمىنىڭ باسپا ءسوز قىزمەتى
https://dalanews.kz/31712
