اۋىل شارۋاشىلىعى مينيسترلىگى ەتتىڭ نە سەبەپتى قىمباتتاعانىن تۇسىندىرۋگە تىرىستى، دەپ حابارلايدى Dalanews.kz.
سوڭعى ۋاقىتتا اقپاراتتىق كەڭىستىكتە سيىر ەتى باعاسىنىڭ ءوسۋى مەن ىشكى نارىقتا ەت تاپشىلىعىنىڭ ىقتيمالدىعىنا قاتىستى الاڭداۋشىلىق بايقالىپ وتىر. الايدا 2025 جىلدىڭ 7 ايىنداعى ناقتى دەرەكتەر سالاداعى تۇراقتىلىق پەن وڭ ديناميكانى كورسەتەدى.
شىلدە ايىنىڭ سوڭىنداعى جاعداي بويىنشا ءىرى قارا مال باسى 8،7 ملن باسقا جەتتى، ونىڭ ىشىندە 4،5 ملن سيىر (+3،1%). بۇزاۋلاردىڭ سانى 2،7 ملن باسقا دەيىن ءوستى (+17،9%)، بۇل ءوندىرىس كولەمىن ودان ءارى ارتتىرۋعا نەگىز.
قاڭتار–شىلدە ايلارىندا ەلدە 608،8 مىڭ توننا ەت ءوندىرىلدى (+1،8%)، ونىڭ ىشىندە 205،7 مىڭ تونناسى سيىر ەتى. بۇل ىشكى نارىقتا جەتكىلىكتى ۇسىنىستىڭ بارىن جانە سالانىڭ تۇراقتى دامۋىن راستايدى.
وندىرۋشىلەردەن شىققان ءىقم ەتىنە كوتەرمە باعالار كگ 2400–3100 تەڭگە ارالىعىندا، بولشەك ساۋدادا - 3000–3700 تەڭگە/كگ، وڭىرگە بايلانىستى وزگەرىپ وتىرادى. باعانىڭ ءوسۋى ىشكى فاكتورلارعا بايلانىستى: سەلەكسيالىق-اسىل تۇقىمدىق جۇمىستى سۋبسيديالاۋ توقتاتىلدى، ەنەرگيا رەسۋرستارى قىمباتتادى (ەلەكتر ەنەرگياسى +11،3%، گاز +15،9%، سۋ +96%-عا دەيىن)، جەم-شوپ، ججم، ۆەتەرينارلىق پرەپاراتتار قۇنى ارتتى، اوك-دەگى جالاقى كوتەرىلدى، سونداي-اق جەتكىزۋ تىزبەگىندەگى دەلدالداردىڭ اسەرى بايقالادى.
سونىمەن قاتار، قازاقستاندىق سيىر ەتىنە سىرتقى نارىقتاعى سۇرانىس ارتىپ كەلەدى.
قاڭتار–ماۋسىم ايلارىندا ەكسپورت كولەمى 16،1 مىڭ توننانى قۇراپ، 2،4 ەسە ءوستى. نەگىزگى باعىتتار - وزبەكستان، تاجىكستان، قىرعىزستان، جۇڭگو جانە ءباا. بۇل وتاندىق ءونىمنىڭ ساپاسى مەن باسەكەگە قابىلەتتىلىگىن دالەلدەيدى.
قازىرگى تاڭدا بورداقىلاۋ الاڭدارىنىڭ جۇكتەمەسى 35–40%-دى قۇرايدى. ونى ارتتىرۋ ماقساتىندا 2025 جىلعى 1 تامىزدان باستاپ جىلدىق 5%-بەن 12 ايعا جەڭىلدەتىلگەن كرەديتتەۋ باعدارلاماسى ەنگىزىلدى. بۇل ماقساتقا 50 ملرد تەڭگە ءبولىندى. باعدارلاما جاس مالدى، جەم-شوپتى، ججم مەن جابدىقتى ساتىپ الۋدى قارجىلاندىرادى جانە بورداقىلاۋ الاڭدارىنىڭ جۇكتەمەسىن 60%-عا جانە ودان جوعارى دەڭگەيگە جەتكىزۋگە مۇمكىندىك بەرەدى.
باعانىڭ وسۋىنە قاراماستان، قازىرگى سيىر ەتى قۇنى وندىرۋشىلەر ءۇشىن ءالى دە تابىستى بولىپ وتىر. مەملەكەتتىك قولداۋ ۇسىنىستىڭ قىسقارۋىنا ەمەس، ارتۋىنا ىقپال ەتىپ، ىشكى نارىقتىڭ قاجەتتىلىكتەرىن تولىق قامتاماسىز ەتۋدە.
