سەنات ءتوراعاسى ماۋلەن اشىمبايەۆ ۋاقىت بەلدەۋىنىڭ اۋىسۋى ونىڭ كۇندەلىكتى ومىرىنە قالاي اسەر ەتكەنىن جەتكىزدى، دەپ حابارلايدى Dalanews.kz.

ايتۋىنشا، ادەتتەگى ومىرىندە ايتارلىقتاي وزگەرىستەر بولماعان.

“ەرتە تۇرىپ، كەش جاتۋ كوپتەن بەرى قالىپتاسقان داعدىم. جۇمىسقا بايلانىستى ءىس-شارالارعا قاتىسۋ، كەڭەستەر وتكىزۋ – كۇندەلىكتى تىرشىلىگىمنىڭ ءبىر بولىگى. سول سەبەپتى ۋاقىت بەلدەۋىنىڭ اۋىسۋىن اسا سەزىنبەدىم.  مۇمكىن، جۇمىستان قول تيمەگەن سوڭ، بايقاماي قالعان شىعارمىن.”، – دەدى اشىمبايەۆ.

ايتا كەتەيىك، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك ۋاقىت بەلدەۋىندەگى وزگەرىستىڭ قازاقستاندىقتارعا اسەرىن زەرتتەۋ ءۇشىن ءۇش جىلدىق بيۋدجەتتەن 160 ملن تەڭگە بولىنەتىنىن مالىمدەگەن بولاتىن.

“ءۇش جىلدىق زەرتتەۋگە ءوتىنىم ءتۇستى. ەندى بيۋدجەتتەن 160 ميلليون تەڭگە بولىنبەك. ءبىراق ءىس جۇزىندە بۇل سوما ەكى ەسەگە قىسقارىپ، شامامەن 90-100 ميلليون تەڭگە كولەمىندە بولادى دەپ ويلايمىن”، – دەدى ول.

مينيستر زەرتتەۋدىڭ قۇنى كونكۋرستىڭ ناتيجەسىنە سايكەس انىقتالاتىنىن جانە بۇل ماسەلەنى ۇلتتىق عىلىمي كەڭەس شەشەتىنىن ايتتى. ونىڭ سوزىنشە، جوبانىڭ ناقتى ەگجەي-تەگجەيى ءوتىنىم قارالعاننان كەيىن بەلگىلى بولادى.

زەرتتەۋ پروسەسىنە بىرنەشە ينستيتۋت، سونىڭ ىشىندە فيزيولوگيا جانە گەوگرافيا ينستيتۋتتارى تارتىلۋى مۇمكىن. ادىستەر ءالى ناقتىلانباعانىمەن، ساۋالنامادان تىس تاسىلدەر قولدانىلىپ، ماسەلەنىڭ كەشەندى تۇردە قارالاتىنى ايتىلدى.

“ازىرگە تەك ءوتىنىم بەرىلدى، ال زەرتتەۋ ادىستەمەسى مەن ونى جۇزەگە اسىرۋ جولدارى كونكۋرس وتكىزىلگەننەن كەيىن انىقتالادى”، – دەپ ءتۇسىندىردى مينيستر.