ستۋدەنتتەرمەن كەزدەسۋدە ماۋلەن اشىمبايەۆ ءىس-شارانىڭ قازاقستانداعى عىلىم قىزمەتكەرلەرى كۇنىمەن تۇسپا-تۇس كەلگەنىنە نازار اۋداردى. ول تالانتتى، ءبىلىمدى جاستار ەلىمىزدى جاڭعىرتۋدىڭ درايۆەرى جانە ادىلەتتى قازاقستان قۇرۋ جولىنداعى ماڭىزدى كۇشتەردىڭ ءبىرى بولۋعا ءتيىس ەكەنىن ايتتى. سول سەبەپتى قازاقستاندا ساپالى ءبىلىم ماسەلەسىنە باسا ءمان بەرىلىپ، بۇل باعىتتا جۇيەلى جۇمىس جۇرگىزىلىپ كەلەدى.
سونداي-اق سەنات سپيكەرى قاڭتار وقيعاسى جاستار ساياساتىنا قاتىستى ولقىلىقتاردى ايقىن كورسەتىپ بەرگەنىن ايتىپ، بۇگىندە قازاقستاندا مەملەكەت باسشىسىنىڭ باستاماسىمەن قولعا الىنعان اۋقىمدى رەفورمالاردىڭ ىسكە اسىرىلۋ بارىسىنا توقتالدى.
«پرەزيدەنتىمىز قاسىم-جومارت كەمەل ۇلى توقايەۆ VIII شاقىرىلعان پارلامەنتتىڭ ءبىرىنشى سەسسياسىندا وكىلدى بيلىك تارماعىنا جاس ساياساتكەرلەردىڭ جاڭا بۋىنى كەلىپ جاتقانىن اتاپ ءوتتى. ولار قوعامدا جاڭا قۇندىلىقتاردىڭ كەڭىنەن دارىپتەلۋىنە اسەر ەتۋگە ءتيىس.
سوڭعى جىلدارى جاستاردى مەملەكەتتىك باسقارۋ سالاسىنا جۇمىلدىرۋ جانە ولاردىڭ ازاماتتىق الەۋەتىن ارتتىرۋ ءۇشىن ءبىرقاتار جوبا قولعا الىنىپ، ءتيىستى زاڭدارعا تۇزەتۋلەر ەنگىزىلدى. سەنات جانىندا زاڭ جوبالارىن ساراپتاۋعا جانە پارلامەنت فۋنكسيالارىن ىسكە اسىرۋعا جاس ساراپشىلاردى تارتۋعا ارنالعان قوعامدىق جوبالار قولعا الىنعان. ولار – سەنات جانىنداعى جاس ساراپشىلار كلۋبى مەن تالداۋ مەكتەبى. سىزدەردى وسى جوبالارعا قاتىسۋعا شاقىرامىز»، – دەدى ماۋلەن اشىمبايەۆ.
كەزدەسۋدە الەمدەگى بۇگىنگى سىن-قاتەرلەر مەن جاس ۇرپاقتىڭ ولارعا قارسى تۇرۋ ماسەلەسى دە اڭگىمەگە ارقاۋ بولدى.
سونداي-اق پالاتا ءتوراعاسى وتكەن عاسىردىڭ 60-جىلدارىندا ماسكەۋدەگى جوعارى وقۋ ورىندارىندا وقىعان قازاقتىڭ بولاشاق عالىمدارى مەن كورنەكتى قوعام قايراتكەرلەرى بىرنەشە بۋىننىڭ باسىن قوسقان «جاس تۇلپار» بىرلەستىگىن قۇرعانىن ايتتى.
«بىرلەستىكتىڭ باستى ماقساتى قازاقتىڭ مادەنيەتىن، رۋحانياتىن، ونەرىن جانە ادەبيەتىن دارىپتەۋ ەدى. وعان بەلگىلى عالىم مۇرات اۋەزوۆ، عالىم-دەموگراف ماقاش ءتاتىموۆ، قازاقستانداعى مولەكۋلالىق بيولوگيانىڭ نەگىزىن قالاۋشى مۇرات ايتقوجين سياقتى ءىرى تۇلعالارىمىز مۇشە بولدى. باسقا دا كوپتەگەن بەلگىلى ازاماتتارىمىز وسى قالادا ءبىلىم العان كەزدە بىرلەستىك قاتارىندا بولىپ، بەلسەندىلىك تانىتتى. سىزدەر دە وسىنداي يگى ءداستۇردى لايىقتى جالعاستىرىپ، العان بىلىمدەرىڭىزدى ەلىمىزدىڭ دامۋىنا جۇمسايسىزدار دەپ سەنەمىز»، – دەدى ماۋلەن اشىمبايەۆ.
سونىمەن قاتار سەنات سپيكەرى رەسەي مەملەكەتتىك دۋماسىنىڭ ءتوراعاسى ۆياچەسلاۆ ۆولودينمەن كەزدەستى. ماۋلەن اشىمبايەۆ رەسەيلىك ارىپتەسىنە بيىل 19 ناۋرىزدا وتكەن قازاقستان پارلامەنتى ءماجىلىسى دەپۋتاتتارىنىڭ سايلاۋىنا حالىقارالىق بايقاۋشى رەتىندە بەلسەندى قاتىسىپ، ساياسي ناۋقاندى وبەكتيۆتى باعالاعانى ءۇشىن العىس ءبىلدىردى.
سەنات سپيكەرى سايلاۋ ەل پرەزيدەنتى قاسىم-جومارت توقايەۆ باستاماشىلىق ەتكەن ساياسي رەفورمالار اياسىندا وتكەنىن، وسىلايشا قازاقستاننىڭ تۇتاس ساياسي جۇيەسىن قايتا جاڭعىرتۋدى كوزدەگەن ۇلكەن سايلاۋ سيكلى اياقتالعانىن ايتتى.
ودان بولەك، سۇحبات كەزىندە مەملەكەتتىك دۋما دەپۋتاتتارىمەن ساۋدا-ەكونوميكالىق، ينۆەستيسيالىق، مادەني-گۋمانيتارلىق جانە وزگە دە سالالارداعى ەكىجاقتى ىنتىماقتاستىقتىڭ قۇقىقتىق بازاسىن جەتىلدىرۋ جونىندەگى ءوزارا ءىس-قيمىل پەرسپەكتيۆالارىن تالقىلاندى.
