Stýdenttermen kezdesýde Máýlen Áshimbaev is-sharanyń Qazaqstandaǵy Ǵylym qyzmetkerleri kúnimen tuspa-tus kelgenine nazar aýdardy. Ol talantty, bilimdi jastar elimizdi jańǵyrtýdyń draiveri jáne Ádiletti Qazaqstan qurý jolyndaǵy mańyzdy kúshterdiń biri bolýǵa tiis ekenin aitty. Sol sebepti Qazaqstanda sapaly bilim máselesine basa mán berilip, bul baǵytta júieli jumys júrgizilip keledi.
Sondai-aq Senat Spikeri qańtar oqiǵasy jastar saiasatyna qatysty olqylyqtardy aiqyn kórsetip bergenin aityp, búginde Qazaqstanda Memleket basshysynyń bastamasymen qolǵa alynǵan aýqymdy reformalardyń iske asyrylý barysyna toqtaldy.
«Prezidentimiz Qasym-Jomart Kemeluly Toqaev VIII shaqyrylǵan Parlamenttiń birinshi sessiiasynda ókildi bilik tarmaǵyna jas saiasatkerlerdiń jańa býyny kelip jatqanyn atap ótti. Olar qoǵamda jańa qundylyqtardyń keńinen dáriptelýine áser etýge tiis.
Sońǵy jyldary jastardy memlekettik basqarý salasyna jumyldyrý jáne olardyń azamattyq áleýetin arttyrý úshin birqatar joba qolǵa alynyp, tiisti zańdarǵa túzetýler engizildi. Senat janynda zań jobalaryn saraptaýǵa jáne Parlament fýnktsiialaryn iske asyrýǵa jas sarapshylardy tartýǵa arnalǵan qoǵamdyq jobalar qolǵa alynǵan. Olar – Senat janyndaǵy Jas sarapshylar klýby men Taldaý mektebi. Sizderdi osy jobalarǵa qatysýǵa shaqyramyz», – dedi Máýlen Áshimbaev.
Kezdesýde álemdegi búgingi syn-qaterler men jas urpaqtyń olarǵa qarsy turý máselesi de áńgimege arqaý boldy.
Sondai-aq Palata Tóraǵasy ótken ǵasyrdyń 60-jyldarynda Máskeýdegi joǵary oqý oryndarynda oqyǵan qazaqtyń bolashaq ǵalymdary men kórnekti qoǵam qairatkerleri birneshe býynnyń basyn qosqan «Jas tulpar» birlestigin qurǵanyn aitty.
«Birlestiktiń basty maqsaty qazaqtyń mádenietin, rýhaniiatyn, ónerin jáne ádebietin dáripteý edi. Oǵan belgili ǵalym Murat Áýezov, ǵalym-demograf Maqash Tátimov, Qazaqstandaǵy molekýlalyq biologiianyń negizin qalaýshy Murat Aitqojin siiaqty iri tulǵalarymyz múshe boldy. Basqa da kóptegen belgili azamattarymyz osy qalada bilim alǵan kezde birlestik qatarynda bolyp, belsendilik tanytty. Sizder de osyndai igi dástúrdi laiyqty jalǵastyryp, alǵan bilimderińizdi elimizdiń damýyna jumsaisyzdar dep senemiz», – dedi Máýlen Áshimbaev.
Sonymen qatar Senat Spikeri Resei Memlekettik Dýmasynyń Tóraǵasy Viacheslav Volodinmen kezdesti. Máýlen Áshimbaev reseilik áriptesine biyl 19 naýryzda ótken Qazaqstan Parlamenti Májilisi depýtattarynyń sailaýyna halyqaralyq baiqaýshy retinde belsendi qatysyp, saiasi naýqandy obektivti baǵalaǵany úshin alǵys bildirdi.
Senat Spikeri sailaý el Prezidenti Qasym-Jomart Toqaev bastamashylyq etken saiasi reformalar aiasynda ótkenin, osylaisha Qazaqstannyń tutas saiasi júiesin qaita jańǵyrtýdy kózdegen úlken sailaý tsikli aiaqtalǵanyn aitty.
Odan bólek, suhbat kezinde Memlekettik Dýma depýtattarymen saýda-ekonomikalyq, investitsiialyq, mádeni-gýmanitarlyq jáne ózge de salalardaǵy ekijaqty yntymaqtastyqtyń quqyqtyq bazasyn jetildirý jónindegi ózara is-qimyl perspektivalaryn talqylandy.
