سەنات ءتوراعاسى ماۋلەن اشىمبايەۆ جاڭا سالىق كودەكسىندەگى ءبىر نورما بويىنشا قارجى مينيسترلىگىنىڭ جۇمىسىن سىنعا الدى، دەپ حابارلايدى Dalanews.kz.
سەناتتا جاڭا سالىق كودەكسى جوباسى قارالدى. وتىرىس بارىسىندا ماۋلەن اشىمبايەۆ قۇجاتتا ققس مولشەرىن كوتەرۋ عانا ەمەس، سونىمەن قاتار، الدىن الا تولەم ەنگىزۋ دە كوزدەلگەنىنە نازار اۋداردى. ول مۇنداي جاعدايدا بيزنەستىڭ احۋالى قانداي بولاتىنىن سۇرادى.
قارجى ۆيسە-مينيسترى ەرجان ءبىرجانوۆ جۇيە سالىق تولەۋشىلەردىڭ بارىنە ەمەس، تەك قاۋىپكە ۇشىراعاندارعا قولدانىلاتىنىن ناقتىلادى:
"ققس - تىكەلەي ەمەس، جاناما سالىق. سالىق تولەۋشى بىرەۋدەن تاۋار ساتىپ السا، ونىڭ ەسەپكە جاتقىزىلعان بولىگى بولۋى كەرەك. ياعني ونىڭ كىرىسى بولۋى كەرەك. بۇل كىرىستى ونلاين رەجيمىندە اۆتوماتتى تۇردە كورەمىز. مىسالى ساعات 10:00-دە وعان شوت-فاكتۋرا جازىلسا، 10:01-دە ونىڭ ەسەپكە جاتقىزىلعان بولىگى بارىن كورەمىن. ول ايىرماعا، قوسىلعان قۇنعا عانا شوت-فاكتۋرا جازادى. مىسالى ەگەر ەسەپكە جاتقىزۋ كولەمى 10 مىڭ تەڭگە بولسا، ال ول 11 مىڭعا ساتسا، تەك 1 مىڭ تەڭگەنى "الدىن الا" ءوز شوتىنا سالۋى كەرەك. بۇل ققس-تى ءبىز بىردەن بيۋدجەتكە الىپ قويمايمىز. ول سالىق كەزەڭى اياقتالعاننان كەيىن ونى بيۋدجەتكە تولەي الادى. بۇل ءقاۋپى جوعارى سالىق تولەۋشىلەرگە ارنالعان كەپىلدىك رەتىندە قاراستىرىلىپ وتىر"، – دەدى ءبىرجانوۆ.
ۆيسە-مينيستر بۇل ماسەلە بيزنەس، "اتامەكەن" ۇكپ جانە دەپۋتاتتارمەن تالقىلانعانىن ايتتى. ونىڭ سوزىنە قاراعاندا، مۇنداي مەحانيزم جالعان شوت-فاكتۋرالارمەن كۇرەستە وزگە ەلدەردە دە ءتيىمدى قۇرال رەتىندە قاراستىرىلادى.
"سالىق كودەكسىن قاراۋ كەزىندە العان، وسى اپتالاردا، وسى ايلاردا العان مالىمدەمەلەردى ەسكەرسەك، بۇل اسىرا سىلتەۋ بولسا كەرەك. كاسىپكەردىڭ قۇقىقتارى جونىندەگى ۋاكىلدىڭ بۇل ماسەلە بويىنشا باسقا ۇستانىمى بار، ول سوڭعى ادام ەمەس. "اتامەكەننىڭ" ۇستانىمى دا ءسىز ايتقانداي ەمەس. سوندىقتان دۇرىس اقپارات بەرۋ كەرەك"، - دەدى اشىمبايەۆ.
ونىڭ ايتۋىنشا، قارجى مينيسترلىگى وسى مەحانيزمدى ەنگىزۋدى كوزدەسە، وندا زاڭ جۇزىندە ناقتى "تاۋەكەلى جوعارى" ساناتىنا كىمدەر كىرەتىنىن ايقىنداۋ قاجەت. ايتپەسە بۇل نورما بارلىق كاسىپكەرگە اسەر ەتىپ، سالىق ورگاندارى "جوسپاردى ورىنداۋ ءۇشىن" ونى سۋبەكتيۆتى تۇردە قولدانا باستايدى.
"مۇنداي وسال تۇستاردى سول كۇيى قالدىرساڭىزدار، كەيىن بۇل بيزنەسىمىزدىڭ دامۋىنا وتە ۇلكەن پروبلەما بولىپ شىعادى. ...ماسەلە سىزدەر ايتىپ وتىرعانداي جاي ءسوز ەمەس. ءبىز دە بۇل ماسەلەلەردى مۇقيات قاراستىردىق. ءبىز دە بۇل تاۋەكەلدەردى ءتۇسىنىپ وتىرمىز. سوندىقتان بىرەۋمەن كەلىسىلدى دەيتىن كەزدە شىنايى، ءدال اقپارات بەرىلۋى كەرەك"، – دەدى سەنات سپيكەرى.
ول قارجى مينيسترلىگىنەن وسى ماسەلەگە قاتىستى ناقتى ۇستانىم دايىنداۋدى تالاپ ەتتى.
ءقازىر سەناتتا جاڭا سالىق كودەكسى جوباسى قارالىپ جاتىر. قۇجات ەكىنشى وقىلىمدا تالقىلانادى.
