Senat tóraǵasy Máýlen Áshimbaev jańa Salyq kodeksindegi bir norma boiynsha Qarjy ministrliginiń jumysyn synǵa aldy, dep habarlaidy Dalanews.kz.
Senatta jańa Salyq kodeksi jobasy qaraldy. Otyrys barysynda Máýlen Áshimbaev qujatta QQS mólsherin kóterý ǵana emes, sonymen qatar, aldyn ala tólem engizý de kózdelgenine nazar aýdardy. Ol mundai jaǵdaida biznestiń ahýaly qandai bolatynyn surady.
Qarjy vitse-ministri Erjan Birjanov júie salyq tóleýshilerdiń bárine emes, tek qaýipke ushyraǵandarǵa qoldanylatynyn naqtylady:
"QQS - tikelei emes, janama salyq. Salyq tóleýshi bireýden taýar satyp alsa, onyń esepke jatqyzylǵan bóligi bolýy kerek. Iaǵni onyń kirisi bolýy kerek. Bul kiristi onlain rejiminde avtomatty túrde kóremiz. Mysaly saǵat 10:00-de oǵan shot-faktýra jazylsa, 10:01-de onyń esepke jatqyzylǵan bóligi baryn kóremin. Ol aiyrmaǵa, qosylǵan qunǵa ǵana shot-faktýra jazady. Mysaly eger esepke jatqyzý kólemi 10 myń teńge bolsa, al ol 11 myńǵa satsa, tek 1 myń teńgeni "aldyn ala" óz shotyna salýy kerek. Bul QQS-ty biz birden biýdjetke alyp qoimaimyz. Ol salyq kezeńi aiaqtalǵannan keiin ony biýdjetke tólei alady. Bul qaýpi joǵary salyq tóleýshilerge arnalǵan kepildik retinde qarastyrylyp otyr", – dedi Birjanov.
Vitse-ministr bul másele biznes, "Atameken" UKP jáne depýtattarmen talqylanǵanyn aitty. Onyń sózine qaraǵanda, mundai mehanizm jalǵan shot-faktýralarmen kúreste ózge elderde de tiimdi qural retinde qarastyrylady.
"Salyq kodeksin qaraý kezinde alǵan, osy aptalarda, osy ailarda alǵan málimdemelerdi eskersek, bul asyra silteý bolsa kerek. Kásipkerdiń quqyqtary jónindegi ýákildiń bul másele boiynsha basqa ustanymy bar, ol sońǵy adam emes. "Atamekenniń" ustanymy da siz aitqandai emes. Sondyqtan durys aqparat berý kerek", - dedi Áshimbaev.
Onyń aitýynsha, Qarjy ministrligi osy mehanizmdi engizýdi kózdese, onda zań júzinde naqty "táýekeli joǵary" sanatyna kimder kiretinin aiqyndaý qajet. Áitpese bul norma barlyq kásipkerge áser etip, salyq organdary "jospardy oryndaý úshin" ony sýbektivti túrde qoldana bastaidy.
"Mundai osal tustardy sol kúii qaldyrsańyzdar, keiin bul biznesimizdiń damýyna óte úlken problema bolyp shyǵady. ...Másele sizder aityp otyrǵandai jai sóz emes. Biz de bul máselelerdi muqiiat qarastyrdyq. Biz de bul táýekelderdi túsinip otyrmyz. Sondyqtan bireýmen kelisildi deitin kezde shynaiy, dál aqparat berilýi kerek", – dedi Senat spikeri.
Ol Qarjy ministrliginen osy máselege qatysty naqty ustanym daiyndaýdy talap etti.
Qazir Senatta jańa Salyq kodeksi jobasy qaralyp jatyr. Qujat ekinshi oqylymda talqylanady.
