بيىل دا تاڭنان قىزدار ۋنيۆەرسيتەتٸنٸڭ ۇجىمى بٸر-بٸرٸمەن قۇشاق جايا امانداسىپ, ايدان امان, جىلدان ەسەن شىققانىنا قۋانىپ, اق تٸلەكتەر ايتىپ, ەن مەن كٷي تەربەلگەن ايرىقشا جاعدايدا اتاپ ٶتتٸ.
قازاق مەملەكەتتٸك قىزدار پەداگوگيكالىق ۋنيۆەرسيتەتٸنٸڭ رەكتورى دينار نٶكەتاەۆا مەرەكەنٸڭ ماڭىزدىلىعىنا توقتالىپ ٶتٸپ, بارشا قاۋىمدى كٶكتەمنٸڭ شۋاقتى دا, مەرەيلٸ مەرەكەسٸمەن قۇتتىقتادى.
– بۇل مەرەكەدە دەستٷر بويىنشا, اعايىن ەۋلەتتٸڭ باس يەسٸنە, اۋىل-ايماق اۋىلدىڭ ٷلكەن اقساقالىنا, جاسى كٸشٸلەر ٷلكەندەرگە ارنايى بارىپ, حال-جاعدايلارىن, وتباسى اماندىعىن سۇراپ, قول بەرٸپ كٶرٸسٸپ, «بٸر جاسىمەن» قۇتتىقتاپ, اق باتالارىن العان. قانداي كەرەمەت دەستٷر. الىستى جاقىنداتاتىن, ٶكپەنٸ كەشٸرەتٸن, تاتۋلىقتى ارتتىراتىن قانداي تاماشا مەرەكە. بٸز دەستٷرٸمٸزدٸ ساقتاۋ, ۇلىستىڭ ۇلى كٷنٸن قادٸرلەۋ ارقىلى ۇلتتىق قۇندىلىقتارىمىزدى, سالت-دەستٷرٸمٸزدٸ ساقتاي وتىرىپ, ۇرپاقتان-ۇرپاققا ميراس ەتە الامىز. امال مەرەكەسٸمەن باستالاتىن ناۋرىز ەلٸمٸزگە قۇت-بەرەكەسٸمەن, مولشىلىعىمەن كەلٸپ, ەربٸر شاڭىراققا قۋانىش پەن شاتتىق سىيلاسىن. بارشاڭىزعا دەندەرٸڭٸزگە ساۋلىق, قىزمەتتەرٸڭٸزگە مول تابىس, وتباسىلارىڭىزعا قۋانىش پەن شاتتىق, باقىت پەن بەرەكە تٸلەيمٸن!, – دەدٸ د.نٶكەتاەۆا.
كٶرٸسۋمەن باستالعان امال مەرەكەسٸ بٸر ەمەس, ارۋلار ورداسىنىڭ بٸرنەشە عيماراتتارىندا اتاپ ٶتٸلدٸ. ٶنەرپاز قىزدار ەننەن شاشۋ شاشسا, جٸگٸتتەر كٷمبٸرلەتە كٷي شەرتتٸ. قىزدار ۋنيۆەرسيتەتٸنٸڭ اۋزى دۋالى اپا-ەجەلەرٸمٸز قاسيەتتٸ ادىراسپان شٶبٸمەن «الاستاۋ» رەسٸمٸن جاساپ, «باسىمىزعا باياندى باقىت قونسىن!», دەسسە, وقۋ ورىننىڭ اقساقالدارى «جاڭبىرمەن جەر كٶگەر, باتامەن ەل كٶگەر» دەيتٸن دانا حالقىمىزدىڭ سالتىمەنەن جاستارعا اق باتاسىن بەردٸ. مەرەكەدە توقشىلىقتىڭ باسى, بەرەكە باستاۋى – جەتٸ تٷرلٸ دەمنەن جاسالعان ناۋرىز كٶجە تاراتىلىپ, مەرەكەلٸك شاشۋ شاشىلدى. شارا پاراسات مەكتەبٸ ٶنەرپازدارىنىڭ دايىنداۋىنداعى مەرەكەلٸك كونتسەرتتٸك باعدارلامامەن جالعاستى.
امال مەرەكەسٸنە وقۋ ورىننىڭ وقىتۋشى-پروفەسسورلار قۇرامى, وقۋ ورىن ۇجىمى مەن ستۋدەنتتەر قاتىستى.
«قىزدار ۋنيۆەرسيتەتٸ» مەديا ورتالىعى
