Telegram-داعى كەيبىر دەرەككوزدەر انتيكوردىڭ بۇرىنعى باسشىسى تالعات تاتۋبايەۆ ۇستالعاننان كەيىن ق ر باس پروكۋراتۋراسىنىڭ ارنايى پروكۋرورلار قىزمەتىنىڭ بۇرىنعى باستىعى ولەسيا كەكسەل دە تۇتقىندالىپ، ءۇي قاماققا الىنعانىن جارىسا حابارلاۋدا، دەپ جازادى Dalanews.kz.
انتيكوردىڭ بۇرىنعى باسشىسى تالعات تاتۋبايەۆتىڭ ۇستالعانىن كۇنى كەشە باس پروكۋراتۋرا راستاعان بولاتىن.
"3 شىلدەدە قىلمىستىق كودەكستىڭ 146-بابى 2-بولىگىنىڭ 1)، 2) تارماقتارىندا كوزدەلگەن قىلمىستى (ازاپتاۋ) جاسادى دەگەن كۇدىكپەن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ بۇرىنعى باسشىسى ت.م. تاتۋبايەۆ ۇستالدى"، دەلىنگەن حابارلامادا.
ءقازىر سوت الدى تەرگەپ-تەكسەرۋ شارالارى جۇرگىزىلۋدە.
انتيكوردىڭ ەكس باسشىسى (ۇلتتىق بيۋرو) تالعات تاتۋبايەۆتىڭ ۇستالۋىمەن نىعماتۋللين-قوجامجاروۆ كلانى تولىقتاي كۇيرەتىلىپ، ءوز ءومىرىن توقتاتتى. "جاڭا قازاقستان" سەناتور قايرات قوجامجاروۆتىڭ القىمىنا ءبىر تابان جاقىنداي ءتۇستى.
DALA INSIDE دەرەككوزىنىڭ سوزىنشە، "پارلامەنتتەگى وكىلەتتىلىگى بىتكەننەن كەيىن قايرات پەرنەش ۇلىنىڭ ءومىرى قيىنداي تۇسەدى". تاتۋبايەۆتىڭ ءتۇرلى تاپسىرمالارىن ەكى ەتپەي، رەزونانستى ىستەردىڭ شوقپار تەرگەۋشىسى بولعان ولەسيا كەكسەل دە جاقىن ارادا ۇستالۋى ءتيىس ەكەنى بولجانعان. ول دا ازاپتاۋعا قاتىستى قىلمىستىق ءىس وربيتاسىندا ءجۇر.
"كەكسەل كوپتەگەن ىقپالدى كلانداردىڭ اياعىن باسقان ادام. ونىڭ ىستەگەن ىستەرىن ەشكىم ۇمىتقان جوق. شاعىن زاڭ بۇزۋشىلىقتارى بار، ايتارلىقتاي قاتەلىكتەرى بار، ءبارى جىپكە تىزىلۋدە. كوپ ادام تەرگەۋگە كومەكتەسكىسى كەلەدى. كەكسەلدىڭ ۇستىنەن كۋاگەر بولعىسى كەلەتىندەر از ەمەس"، - دەيدى دەرەككوز.
ال تاتۋبايەۆتى ارداگەر جۋرناليست سەيىتقازى ماتايەۆتىڭ كيەسى ۇردى. ءتىپتى نازاربايەۆ تا پرەزيدەنت كەزىندە ماتايەۆتى كۋعىنداۋدى قۇپتاماعان بولاتىن. ءبىراق نۇرلان نىعماتۋللين بوي بەرمەي قويعان. اقىرى تاتۋبايەۆتار اكەلى-بالالى ماتايەۆتاردى جازىقسىز قۋدالاپ، تۇرمەگە توعىتتى. ماتايەۆتار ءوز كىناسىن مويىنداعان جوق. ارتىنان ولاردى "جاڭا قازاقستان" تولىعىمەن اقتاپ شىقتى.
بەلگىلى جۋرناليست اسەت ماتايەۆ ازاپتاۋ بابى بويىنشا ۇستالعان بۇرىنعى گەنەرال تالعات تاتۋبايەۆقا قاتىستى ءوزىنىڭ باسىنان وتكەن وقيعانى ەسكە الىپ، فەيسبۋكتا جازبا قالدىرعان. ونىڭ سوزىنشە، 2016 جىلى ول قارجى پوليسياسى باسشىسىنىڭ ورىنباسارى تالعات تاتۋبايەۆپەن ەكى رەت كەزدەسكەن. سول كەزدە فينپول وكىلى ماتايەۆتار وتباسىنا قىلمىستىق كودەكستىڭ 65-بابى (كىناسىن مويىنداپ، شىن وكىنگەنى ءۇشىن جاۋاپكەرشىلىكتەن بوساتۋ) بويىنشا كىنانى مويىنداۋدى ۇسىنعان.
"سول كەزدە اكەم ەكەۋمىزگە جالعان ايىپ تاعىلىپ جاتقانىن ايتتىم. لوگيكالىق ارگۋمەنتتەرىمدى ەستىگەندە، ونىڭ كوزى جىپىلىقتاپ كەتتى. سول ساتتە ونىڭ "زاڭ ادامى" ەمەس، "اراپايىم كوشە ادامى سياقتى سويلەپ تۇرعانىن ءتۇسىندىم. اڭگىمەسىنىڭ بار مازمۇنى – «جوعارىدان تاپسىرىس ءتۇستى، ءبارىبىر تۇرمەگە جابىلاسىڭدار" دەگەنگە سايدى"، – دەپ ەسكە الادى اسەت ماتايەۆ.
ءجۋرناليستىڭ ايتۋىنشا، سول ءىس بويىنشا بىرنەشە تانىمال تۇلعا – جوعارعى سوتتىڭ سول كەزدەگى باسپا ءسوز حاتشىسى بولات كاليانبەكوۆ (قازىرگى ءماجىلىس اپپاراتى باسشىسىنىڭ ورىنباسارى)، "قازاقتەلەكومنىڭ" ۆيسە-پرەزيدەنتى ماحانبەتاجييەۆ، اقپارات كوميتەتىنىڭ بۇرىنعى ءتوراعاسى بەرسەبايەۆ سەكىلدى شەنەۋنىكتەر قاماۋعا الىنعان. ءبىراق ولار قىسىمعا توتەپ بەرە الماي، ءبىر كۇن تەرگەۋ يزولياتورىندا وتىرعان سوڭ، قارجى پوليسياسى قويعان شارتتارعا كەلىسكەن.
"ولاردىڭ بارلىعى ءبىر-بىر كۇن تەرگەۋ يزولياتورىندا بولىپ، بىزگە جالا جابۋعا ءماجبۇر بولدى. ءىس جۇزىندە بيلىك پەن فينپولدىڭ تالابىنا كونگەن ادامدار ەدى. ولاردىڭ ءبىرازى نۇرلان نىعماتۋلين، باعلان مايلىبايەۆ، باۋىرجان بايبەك، اسقار جۇماعالييەۆ سەكىلدى تۇلعالارعا جاقىن ادامدار بولاتىن"، – دەپ جازدى جۋرناليست.
سونداي-اق ول جوعارعى سوتتىڭ سول كەزدەگى باسپا ءسوز حاتشىسى بولات كاليانبەكوۆتىڭ كەيىنىرەك بەلگىلى قۇقىق قورعاۋشى، "ءادىل ءسوز" قورىنىڭ جەتەكشىسى تامارا كالەيەۆاعا حابارلاسىپ، ماتايەۆتاردى كىنانى مويىنداۋعا كوندىرۋىن سۇراعانىن اتاپ ءوتتى. ماتايەۆتىڭ ايتۋىنشا، كاليانبەكوۆتىڭ ۇستىنەن قوزعالعان ءىس 2021 جىلى قاڭتار وقيعاسىنىڭ الدىندا جابىلىپ قالعان.
"مەن ول كەزدە وتباسىم مەن جاقىندارىمنىڭ قىسىمعا ۇشىراعانىنا كۋا بولدىم. اكەمدى قاماۋعا الىپ، كەيىن ماعان تەلەفون ارقىلى شىعىپ، "ەشتەڭەگە ۋايىمداما، ءىس جابىلادى، ءبارى شيكى ەكەنىن بىلەدى" دەپ سەندىردى. ارينە، سوزىنە تۇرمادى. اكەمدى دە، وتباسىمدى دا، قىزمەتكەرلەرىمىزدى دە ۇكىمگە دەيىن قينادى"، – دەيدى ول.
اسەت ماتايەۆ اكەسىنىڭ تۇرمەدەن شىققان سوڭ، مەديافورۋمدا "تەنگرينيۋس" جەتەكشىسى باتىر قازىبايەۆتىڭ كەلىپ، كەشىرىم سۇراعانىن دا ايتتى. قازىبايەۆ اقپارات قۇرالىندا ماتايەۆتارعا قارسى ماتەريالدار شىعارۋ تۋرالى تاپسىرمانى جوعارىدان العانىن مويىنداعان.
جۋرناليست بۇل جازبانى كەك الۋ ماقساتىندا ەمەس، قۇقىق قورعاۋ ورگاندارىنىڭ قىزمەتكەرلەرى ءوز بولاشاعىن ويلانسىن دەگەن نيەتپەن جاريالاعانىن اتاپ ءوتتى.
تاتۋبايەۆ ءوزى قۇرۋعا كومەكتەسكەن سيستەمانىڭ قۇربانى بولدى. كەكسەلدى دە، قوجامجاروۆتى دا وسىنداي تاعدىر كۇتىپ تۇر.
