2024 جىلعى 24 جەلتوقسانداعى جاعداي بويىنشا 13 423 ازاماتقا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا ارنالعان ارناۋلى الەۋمەتتىك تولەم  تاعايىندالدى. ول ءتورت جەردەن بەرىلەدى، دەپ جازادى Dalanews.kz.

قازاقستاندا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا 2024 جىلدىڭ 1 قاڭتارىنان باستاپ ارناۋلى الەۋمەتتىك تولەم ەنگىزىلگەنىن باسا ايتا كەتەلىك.

ەڭبەك جانە حالىقتى الەۋمەتتىك قورعاۋ مينيسترلىگى باسپا ءسوز قىزمەتىنىڭ مالىمەتىنشە، اتالعان تولەمدى تاعايىنداۋعا جالپى 14 195 ادام ءوتىنىش بىلدىرگەن. ەكى كوزدەن تولەنەتىن ارناۋلى الەۋمەتتىك تولەمگە (رەسپۋبليكالىق بيۋدجەت جانە ءبىرىڭعاي جيناقتاۋشى زەينەتاقى قورى) 3 201 ادام جۇگىندى، ونىڭ ىشىندە 3 087 ادامعا تاعايىندالدى.

ءتورت قارجىلاندىرۋ كوزىنەن بەرىلەتىن ءاات (رەسپۋبليكالىق بيۋدجەت، ءبىرىڭعاي جيناقتاۋشى زەينەتاقى قورى، جۇمىس بەرۋشى جانە ءومىردى ساقتاندىرۋ ۇيىمى) تاعايىنداۋعا 10 994 ادام ءوتىنىش ءبىلدىرىپ، ونىڭ 10 336-سىنا تاعايىندالعان.

سونداي-اق، 240 ازامات ساقتاندىرۋ كومپانياسىمەن زەينەتكەرلىك اننۋيتەت شارتىنىڭ جاسالۋىن كۇتۋدە، 138 ازامات سمس حابارلاماعا جاۋاپ بەرمەگەن. مىندەتتى شارتتاردى ورىنداماعاندىقتان، 394 ءوتىنىش بەرۋشىگە ءاات تاعايىنداۋدان باس تارتىلدى.

وڭىرلەر بويىنشا ارناۋلى الەۋمەتتىك تولەمدەردى الۋعا ءوتىنىش بىلدىرگەندەردىڭ ەڭ كوپ سانى قاراعاندى ​​(2 كوزدەن – 546 ادام، 4 كوزدەن – 1 926 ادام)، قوستاناي (2 كوزدەن – 343 ادام، ال 4 كوزدەن – 1 172 ادام) جانە شىعىس قازاقستان (2 كوزدەن – 287 ادام، ال 4 كوزدەن – 1 204 ادام) وبلىستارىندا تىركەلگەن.

ارناۋلى الەۋمەتتىك تولەم تاعايىنداۋ ءۇشىن 55 جاسقا تولۋ جانە ءبىرىڭعاي جيناقتاۋشى زەينەتاقى قورىندا (بۇدان ءارى – بجزق) كەمىندە 7 جىل كاسىپتىك زەينەتاقى اۋدارىمدارىنىڭ بولۋى مىندەتتى شارتتار بولىپ تابىلادى. تولەم زەينەتكەرلىك جاسقا دەيىن تولەنەدى. ارناۋلى الەۋمەتتىك تولەمدەردى الۋ ءۇشىن ەڭبەك جاعدايلارى زياندى جۇمىستارمەن اينالىسپاۋعا ءتيىس. جۇمىسكەرلەر جەڭىل جۇمىسقا اۋىسا الادى، سودان كەيىن ولار جالاقى مەن تولەم الادى نەمەسە دەمالىسقا شىعىپ، زەينەتكە شىققانعا دەيىن ارناۋلى الەۋمەتتىك تولەم الادى.

بجزق دەرەكتەرى بويىنشا ارناۋلى الەۋمەتتىك تولەمدى تاعايىنداۋ ءۇشىن مىندەتتى شارتتاردى ەسكەرە وتىرىپ، اتالعان تولەمدى الۋعا 2024 جىلى 37 مىڭنان استام جۇمىسكەر قۇقىلى بولدى، جالپى تولەمنىڭ ورتاشا مولشەرى 208 مىڭ تەڭگەدەن اسادى. ءاربىر جۇمىسكەر ءۇشىن تولەم مولشەرى بجزق-داعى جيناقتارىنا بايلانىستى بولادى.

الەۋمەتتىك كودەكسكە سايكەس جۇمىس بەرۋشىلەر كاسىپتەرى مەن قىزمەت تۇرلەرى ەڭبەك جاعدايلارى زياندى جۇمىستارمەن اينالىساتىن جۇمىسكەرلەردىڭ، وندىرىستەردىڭ، جۇمىستاردىڭ، كاسىپتەردىڭ تىزبەسىنە ەنگىزىلگەن جۇمىسكەرلەر ءۇشىن مىندەتتى كاسىپتىك زەينەتاقى جارنالارىن اۋدارادى، ولاردىڭ 2،3 مىڭنان استام پوزيسياسى بار. وسىلايشا، ارناۋلى الەۋمەتتىك تولەمدى ەكونوميكانىڭ 17 سالاسىندا، ونىڭ ىشىندە تاۋ-كەن ءوندىرۋ جانە وڭدەۋ ونەركاسىبىندە جانە وزگە دە سالالاردا جۇمىس ىستەيتىن قازاقستاندىقتار الا الادى.