اقمولا وبلىسى قىلمىستىق-اتقارۋ جۇيەسى دەپارتامەنتى بۇرىنعى مادەنيەت ءمينيسترى جانە ۇلتتىق مۋزەيدىڭ ەكس-ديرەكتورى ارىستانبەك مۇحامەدي ۇلى اشتىق جاريالاعانى تۋرالى اقپاراتقا پىكىر ءبىلدىردى، - دەپ حابارلايدى Dalanews.kz.
جەلىدە پايدا بولعان حابارلامادا مۇحامەدي ۇلى كولونيادا اشتىق جاريالاعانى ايتىلادى. الايدا قاجد بۇل اقپاراتتى تەرىسكە شىعاردى.
«سوتتالۋشى اشتىق جاريالاعان جوق. ول تاماق ىشەدى، بۇل بەينەباقىلاۋ كامەرالارىنىڭ جازبالارىمەن دالەلدەنەدى. سونداي-اق، ودان ەشقانداي شاعىم نەمەسە ءوتىنىش تۇسكەن جوق. قۇقىقتىق تارتىپكە سايكەس، سوتتالۋشى ۇيالى تەلەفون ۇستامايدى»، – دەدى دەپارتامەنتتىڭ باسپا ءسوز قىزمەتى وكىلى Tengrinews.kz-كە.
سونىمەن قاتار، قاجد جالعان اقپارات تاراتۋعا جاۋاپكەرشىلىك بارىن ەسكە سالدى.
ارىستانبەك مۇحامەدي ۇلى - بۇرىنعى مادەنيەت جانە سپورت ءمينيسترى، سونداي-اق ۇلتتىق مۋزەيدىڭ باسشىسى. 2024 جىلى 29 اقپاندا ول بىرنەشە قىلمىستىق باپ بويىنشا 11 جىلعا باس بوستاندىعىنان ايىرىلدى.
ايىپتار اراسىندا «التىن ادامنىڭ شەرۋى» كورمەسىندە اقشا جىمقىرۋ، لاۋازىمدىق وكىلەتتىكتى تەرىس پايدالانۋ، «ديپلومات» قوناقۇيىنە قاتىستى رەيدەرلىك ارەكەتتەر جانە پارا بەرۋ ارەكەتى بار.
2024 جىلى تامىزدا ونىڭ ۇكىمى قايتا قارالدى، ءبىراق سوت بۇرىنعى شەشىمدى وزگەرىسسىز قالدىردى.
