Ақмола облысы Қылмыстық-атқару жүйесі департаменті бұрынғы мәдениет министрі және Ұлттық музейдің экс-директоры Арыстанбек Мұхамедиұлы аштық жариялағаны туралы ақпаратқа пікір білдірді, - деп хабарлайды Dalanews.kz.

Желіде пайда болған хабарламада Мұхамедиұлы колонияда аштық жариялағаны айтылады. Алайда ҚАЖД бұл ақпаратты теріске шығарды.

«Сотталушы аштық жариялаған жоқ. Ол тамақ ішеді, бұл бейнебақылау камераларының жазбаларымен дәлелденеді. Сондай-ақ, одан ешқандай шағым немесе өтініш түскен жоқ. Құқықтық тәртіпке сәйкес, сотталушы ұялы телефон ұстамайды», – деді департаменттің баспасөз қызметі өкілі Tengrinews.kz-ке.

Сонымен қатар, ҚАЖД жалған ақпарат таратуға жауапкершілік барын еске салды.

Арыстанбек Мұхамедиұлы - бұрынғы мәдениет және спорт министрі, сондай-ақ Ұлттық музейдің басшысы. 2024 жылы 29 ақпанда ол бірнеше қылмыстық бап бойынша 11 жылға бас бостандығынан айырылды.

Айыптар арасында «Алтын адамның шеруі» көрмесінде ақша жымқыру, лауазымдық өкілеттікті теріс пайдалану, «Дипломат» қонақүйіне қатысты рейдерлік әрекеттер және пара беру әрекеті бар.

2024 жылы тамызда оның үкімі қайта қаралды, бірақ сот бұрынғы шешімді өзгеріссіз қалдырды.