ارىستا كوكتەم باستالعالى بەرى شىركەيگە قارسى دەزينسەكسيالىق جۇمىستار جۇيەلى تۇردە جۇرگىزىلۋدە. بيىل بۇل شارالار ناۋرىز ايىنان باستالىپ، جوسپارعا سايكەس شىلدە ايىنا دەيىن جالعاساتىن بولادى، – دەپ حابارلايدى Ertenmedia.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ارىس قالاسىنا قاراستى ەلدى مەكەندەر ءۇش سەكتورعا ءبولىنىپ، ءارقايسىسىندا ناقتى جوسپار نەگىزىندە جۇمىستار ۇيىمداستىرىلعان. اتاپ ايتقاندا، №7 سەكتورعا بايتوعاي، قوجاتوعاي، شوگىرلى، اقىن-جاقىپ ەلدى مەكەندەرى، №8 سەكتورعا بايىرقۇم، كوكجيدە، جيدەلى، ال №9 سەكتورعا اققالا مەن جوسالى ەلدى مەكەندەرى كىرەدى.
بۇگىنگى تاڭدا عىلىمي توپتىڭ قورىتىندىسىنا (نۇسقاماعا) سۇيەنە وتىرىپ، دەزينسەكسيا جۇمىستارى ەكى ءتۇرلى ادىسپەن جۇرگىزىلۋدە. دەرناسىلدەرمەن كۇرەسۋ ءۇشىن سۋ قويمالارىنا بيولوگيالىق پرەپاراتتار جىبەرۋ ءادىسى قولدانىلسا، شىركەيلەردىڭ شوعىرلانۋ ءقاۋپى جوعارى ايماقتار — سۋ قورعاۋ اۋماقتارى، جاعالاۋداعى اعاشتاردىڭ بۇتالارى، ەلدى مەكەندەر مەن وعان جاقىن ورنالاسقان 10-15 شاقىرىم جەرلەر حيميالىق ادىسپەن زالالسىزداندىرىلۋدا.
ءار سەكتوردا ارنايى تەحنيكا مەن بىلىكتى ماماندار جۇمىلدىرىلعان. ناقتىراق ايتساق، 2 دانا دەزينسەكسيالىق تەحنيكا، 5 دەزينفەكتور مامانى جانە 1 عىلىمي سۇيەمەلدەۋشى مامان تۇراقتى تۇردە جۇمىس جۇرگىزۋدە.
اتالعان جۇمىستاردىڭ ساپالى ءارى ۋاقىتىلى ورىندالۋى ءۇشىن كۇندەلىكتى باقىلاۋ مەن قاداعالاۋ دا ۇيىمداستىرىلعان. بۇل جۇمىستاردى وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى مەن ارىس قالاسى اكىمدىگى جانە اۋىلدىق وكرۋگتەردىڭ جاۋاپتى ماماندارى ءجىتى قاداعالاۋدا ۇستاپ وتىر.
شىركەيگە قارسى اتقارىلىپ جاتقان بۇل كەشەندى شارالار تۇرعىنداردىڭ دەنساۋلىعىن قورعاۋعا، جايلى ءومىر سۇرۋىنە جانە سانيتارلىق جاعدايدى جاقسارتۋعا باعىتتالعان.
