ارىس قالالىق مادەنيەت ۇيىندە 1 قازان – حالىقارالىق قارتتار كۇنىنە وراي مەرەكەلىك شارا ءوتتى. شاراعا قالالىق ارداگەرلەر كەڭەسى مۇشەلەرى مەن ءار سالادا ەڭبەك ەتكەن ارداگەرلەرى ارنايى شاقىرىلىپ، ەرەكشە قۇرمەت كورسەتىلدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ارىس قالاسى اكىمى گۇلجان قۇرمانبەكوۆا ارداقتى ارداگەرلەردى ايتۋلى كۇنمەن قۇتتىقتاپ، جالپىقالالىق مادەني شارالارعا بەلسەندى قاتىسىپ، سالاماتتى ءومىر سالتىن ۇستانعان جانە قالامىزدىڭ دامۋىنا زور ۇلەس قوسقان اتا-اجەلەردى مەدالمەن جانە العىس حاتپەن ماراپاتتادى.
شاھار باسشىسى قۇتتىقتاۋ سوزىندە ارداگەرلەردىڭ ەل مەن جەردىڭ دامۋىنا قوسقان ۇلەسى وراسان ەكەنىن اتاپ ءوتىپ، ولاردىڭ دانالىعى مەن ومىرلىك تاجىريبەسى كەلەشەك ۇرپاققا ۇلگى ەكەنىن ايتتى.
شارادا مادەنيەت ءۇيىنىڭ ونەرپازدارى ارداگەرلەردىڭ قۇرمەتىنە ءان مەن بيدەن، ساحنالىق قويىلىمداردان تۇراتىن اسەرلى كونسەرتتىك باعدارلاما دايىنداپ، مەرەكەنى شىنايى قۋانىشقا بولەدى. شارا بارىسىندا ارداگەرلەر وزدەرىنىڭ ەستەلىكتەرىمەن ءبولىسىپ، بىر-بىرىنە جىلى لەبىزدەرىن ءبىلدىردى.
سونىمەن قاتار 300-گە جۋىق ارداگەرگە مەرەكەلىك سىيلىقتار تابىستالىپ، ولاردىڭ ومىرلىك ەڭبەكتەرى مەن قوعامداعى ورنى تاعى ءبىر مارتە قۇرمەتتەلدى.
مەرەكەلىك شارا ارداگەرلەرگە دەگەن قۇرمەت پەن ىزەتتىلىكتىڭ ايقىن كورىنىسى بولىپ، ەرەكشە كوڭىل كۇيمەن اياقتالدى.
