بۇل تۋرالى ارىس قالاسىنىڭ اكىمى مۇرات قادىربەك مالىمدەدى. ونىڭ ايتۋىنشا ءقازىر ارىس قالاسى مەن ونىڭ ماڭايىنداعى 6 اۋىلدىق وكرۋگتى قوسا العاندا 74 مىڭ حالىق تۇرادى. جەرگىلىكتى اكىمدىك تۇرعىنداردىڭ تالاپ-تىلەگىن ەسكەرىپ قالاعا كوگىلدىر وتىن تارتۋدى قولعا العان. 2016-2017 جىلداردىڭ ارالىعىندا وسى ماقساتقا وبلىستىق بيۋدجەتتەن 88 ملن. تەڭگە قاراجات بولىنگەن.
الدىمەن اقدالا مەن قوجاتوعاي اۋىلدىق وكرۋگتەرىنە گاز جەتكىزىلەتىن بولادى. الداعى 3 جىلدا ارىسقا قاراستى اۋىلدىق وكرۋگتەر كومىردىڭ ماشاقاتىنان قۇتىلىپ، كوگىلدىر وتىننىڭ قىزىعىن كورمەك.
– ارىستى گازداندىرۋدى بىرنەشە كەزەڭگە بولدىك. جوبا تىم اۋقىمدى. اۋقىمدى بولعان سايىن، ونى باقىلاۋ دا قيىنعا سوعاتىنى جاسىرىن ەمەس.
جوبانى كەزەڭگە ءبولۋ بيۋدجەت اقشاسىن ورنىمەن (جيىنتىعى 3،5 ملرد. تەڭگە) جۇمساۋعا، ەندى ءبىر جاعىنان قۇرىلىس جۇمىستارىن تەزدەتىپ اياقتاۋعا سەپتىگىن تيگىزەدى.
قۇرىلىس جۇمىستارىن ءوز موينىنا العان ءۇش مەردىگەر قالانى كوگىلدىر وتىنمەن قامتۋدى كەزەڭ-كەزەڭىمەن جۇرگىزەتىن بولادى.
الدىمەن ارىستى، ونتام جانە سىرداريا اۋىلدارىن گازعا قوسامىز. وسىلايشا 50 مىڭ حالىقتىڭ كوگىلدىر وتىنعا قولى جەتپەكشى. مۇنىڭ ىشىندە 12 مىڭ ءتۇرعىن-ۇي بار. ءبىرىنشى كەزەڭ بويىنشا نىساننىڭ قۇرىلىس جۇمىستارىن جۇرگىزۋگە وبلىستىق بيۋدجەتتەن بيىل 884 ملن تەڭگە. 2019 جىلعا 500 ملن تەڭگە، 2020 جىلعا 1581،0 ملن. تەڭگە قارجى قارالىپ وتىر.
جالپى 2018-2025 جىلدارى قالاعا قاراستى 26 ەلدى مەكەندى تابيعي گازبەن قامتاماسىز ەتۋ جوسپارلاپ قويدىق. بۇل قالا حالقىنىڭ 99،5 پايىزىن قۇرايدى، – دەدى بۇل ورايدا مۇرات قادىربەك.
ونىڭ اتاپ وتكەنىندەي كوگىلدىر وتىننىڭ باعاسىنا قاتىستى جەرگىلىكتى اكىمدىك مەن گاز تاسىمالداۋشى مەكەمە ورتاق ۇيعارىمعا كەلگەن.
– باعا تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ باقىلاۋىندا بولادى. مەردىگەردىڭ مىندەتى – گازدى ءۇي ىرگەسىنە دەيىن جەتكىزىپ بەرۋ. ءارى قاراي كوگىلدىر وتىندى ۇيگە تارتۋ جۇمىستارىن تۇرعىندار ءوز جاۋاپكەرشىلىگىنە الادى.
مۇندا دا اسىرا سىلتەۋشىلىككە جول بەرىلمەيدى. ورتاق باعا بەكىتىلدى. كوگىلدىر وتىندى ءار ۇيگە جەكەلەي قوستىرۋدىڭ قۇنى 160-180 تەڭگەنىڭ توڭىرەگىندە بولادى.
گازدىڭ تاريفىنە قاتىستى الداعى ۋاقىتتا «قازترانسگاز» مەكەمەسىمەن ۇيعارىمعا كەلەمىز. وسىنىڭ اياسىندا كوگىلدىر وتىندى قوسار الدىندا تۇرعىندارمەن جۇزدەسىپ، گاز باعاسى قالاي ەسەپتەلەتىنى تۋرالى ەگجەيلى-تەگجەيلى مالىمەت بەرەمىز، – دەيدى قالا اكىمى.
