شىمكەنت ەلىمىزدەگى ءىرى قالالاردىڭ ءبىرى ەكەنىن ايتقان ايماق باسشىسى دامىعان قالالاردىڭ بارلىعىندا حالىق دەمالاتىن ورىنداردىڭ كوپتەپ ورنالاسۋى زاڭدىلىق ەكەنىن اتاپ ءوتتى. سونىمەن قاتار قالانى كوركەيتۋدىڭ نەگىزگى جۇمىستارىنا توقتالىپ، اتقارىلىپ وتىرعان جۇمىستاردىڭ بارلىعى قالا جۇرتشىلىعىنىڭ يگىلىگى ءۇشىن جاسالىپ جاتقانىن ايتتى.
– بۇگىن حالىقارالىق وتباسى كۇنى. وسىنداي كۇنى وتباسىلىق دەمالىس ورنى - شىمكەنتتىڭ العاشقى ارباتىن حالىقتىڭ يگىلىگىنە بەرىپ وتىرمىز. 1 شاقىرىمعا دەيىن سوزىلعان اربات قۇرىلىسىن ەكى ايدىڭ ىشىندە اياقتاعان قالا اكىمدىگىنىڭ جاۋاپتى باسشىلارىنا العىسىمدى بىلدىرەمىن. ەندى بۇل جەر قالامىزدىڭ ەڭ تارتىمدى دەمالىس ورنى بولادى دەپ ويلايمىن. مۇنداي يگى قادام قالا تۇرعىندارىنىڭ جانە جاس ۇرپاقتىڭ تۋعان جەرگە دەگەن سۇيىسپەنشىلىگىن قالىپتاستىرۋدا اسەرى مول ەكەنىن ايرىقشا اتاپ وتكىم كەلەدى. مۇنداي دەمالىس ورنى الداعى ۋاقىتتا قالاداعى ا.اسقاروۆ پەن بەيبىتشىلىك كوشەسىن دە ورىن تەپپەك. جىل سوڭىنا دەيىن جاڭارىپ، جانداناتىن ول نىسانداردى دا بىرگە تاماشالايتىن بولامىز، – دەدى ج.تۇيمەبايەۆ.
شىمكەنتتىك ارباتتىڭ ۇزىندىعى ءبىر شاقىرىم شاماسىندا. بۇل جەرگە جاڭا شامدار ءىلىنىپ، ورىندىقتار قويىلدى، لاندشافت ديزاينى كوز تارتادى. قالانىڭ جاسىل جەلەگىنە جاڭا رەڭ قوسقان اربات ادەمى گۇلدەرمەن كومكەرىلىپ، جارىق شاشاتىن شامدارمەن بەزەندىرىلگەن. ىڭعايلى دەمالىس ايماعىندا سونىمەن بىرگە ۆەلوسيپەد جولاعى دا قاراستىرىلعان. مۇنداعى 3600 شارشى مەتر اۋماق كوگالداندىرىلىپ، 2000 شارشى مەتر جەردى اياق جولدار الىپ جاتىر. بۇدان بولەك، ول جەرگە 700-گە جۋىق جوكە، تالشىن، اققايىڭ سىندى اعاش تۇرلەرى مەن 1000 ءتۇپ راۋشان گ ۇلى ەگىلدى. تۇنگى ارباتتى جارىق ەتۋگە 76 كوشە شامدارى مەن 45 كىشى تورشەرلەر قويىلدى.
قازىرگى تاڭدا ماماندار ارباتتىڭ ەرەكشە كەلبەتىن اشا تۇسەتىن اركانى قۇرۋ جۇمىسىن اياقتاۋدا. جۋىق ارادا بەكەت باتىر كوشەسىنىڭ بۇل بولىگى ناعىز شىعارماشىلىق ادامدارىنىڭ ورتالىعىنا اينالماق. سەبەبى بۇل اۋماققا سۋرەتشىلەر ءۇيىن سالۋ جوسپارلانۋدا.
وسى كۇنى وبلىس اكىمى ج.تۇيمەبايەۆ وبلىستىق جانە قالالىق ءماسليحاتتىڭ دەپۋتاتتتارىنا «ەسكى قالانى جاڭعىرتۋ» جوباسى اياسىندا اتقارىلىپ جاتقان جۇمىستاردى تانىستىردى. وندا اكىم «قوشقار-اتا» وزەنى جاعالاۋىنىڭ ەنىنەن 10 مەتر، ۇزىندىعى 1200 مەتر جەر حالىق قىدىرىستايتىن دەمالىس ورنىنا اينالاتىنىن اتاپ ءوتتى.
بۇگىندە اتالعان جوبا اياسىندا ورداباسى الاڭىنان وزبەك كوشەسىنە دەيىنگى وزەن بويىمەن ءجۇرىپ وتەتىن 300 مەتردەن استام اياق جول كوگالداندىرىلىپ، اباتتاندىرۋ جۇمىستارى جۇرگىزىلدى.
سونىمەن قاتار حالىق قالاۋلىلارىنا قوشقار اتا وزەنىنىڭ جاعالاۋىندا بوي كوتەرەتىن «قوشقار اتا» تۇرعىن ءۇي كەشەنىنىڭ ماكەتى تانىستىرىلدى. جاڭادان سالىناتىن تۇرعىن ءۇي كەشەنىنىڭ قۇرىلىسى ءۇش كەزەڭنەن جۇرگىزىلەدى. جوبا تولىعىمەن جۇزەگە اسسا، 208 مىڭ شارشى مەتردى قۇرايتىن، 3976 پاتەرلى 61 كوپ قاباتتى تۇرعىن ءۇي ەل يگىلىگىنە تاپسىرىلاتىن بولادى.
وقو اكىمىنىڭ باسپا ءسوز قىزمەتى
https://dalanews.kz/35822
